ye harf harf ke ruKH par KHulus ka ghaza

ye harf harf ke ruḳh par ḳhulūs kā ġhāza

bikhar na jaa.e kahīñ mere dil kā shīrāza

qadam-qadam pe jo miltā hai ik ġham-e-tāza

hamārī dīda-varī kā hai ye bhī ḳhamyāza

ḳhush-āmdīd likhā hai tirī jabīñ pe magar

mire liye hai abhī band dil kā darvāza

kabhī ye vaqf-e-karam hai kabhī taġhāful-dost

tirī nazar se huā tere dil kā andāza

ye jabr-e-shauq samajhte haiñ ham use mā'sūm

falak-maqām hai jis ke sitam kā āvāza

jo ġham nihāñ hai mire parda-e-tabassum meñ

tumhārā kaam nahīñ aise ġham kā andāza

'urūj' merī taraf se hai nazr-e-ahl-e-nazar

vo ik ġhazal ki mazāmīn jis ke haiñ taaza

ye harf harf ke ruKH par KHulus ka ghaza

bikhar na jae kahin mere dil ka shiraaza

qadam-qadam pe jo milta hai ek gham-e-taza

hamari dida-wari ka hai ye bhi KHamyaza

KHush-amdid likha hai teri jabin pe magar

mere liye hai abhi band dil ka darwaza

kabhi ye waqf-e-karam hai kabhi taghaful-dost

teri nazar se hua tere dil ka andaza

ye jabr-e-shauq samajhte hain hum use ma'sum

falak-maqam hai jis ke sitam ka aawaza

jo gham nihan hai mere parda-e-tabassum mein

tumhaara kaam nahin aise gham ka andaza

'uruj' meri taraf se hai nazr-e-ahl-e-nazar

wo ek ghazal ki mazamin jis ke hain taza