ye himaqat mere idrak pe chhai hui hai

ye himāqat mire idrāk pe chhā.ī huī hai

āñsuoñ se tire tasvīr banā.ī huī hai

'arsh hilne kā sabab pūchhte kyā ho mujh se

ik du'ā halqa-e-tāsīr meñ aa.ī huī hai

chāñd maddham hai diye chup haiñ sahar ruuTh ga.ī

kyā mire ġham meñ giraftār ḳhudā.ī huī hai

tum to bas tark-e-ta'alluq ke liye aa hī ga.e

ab ke is dil ne magar baat baḌhā.ī huī hai

munkashif hone lagā ḳhuun hathelī pe mire

ek laḌkī kī hathelī jo hinā.ī huī hai

itnī vahshat ki havas vajd meñ aane se rahī

ik sadā jānib-e-aflāk se aa.ī huī hai

chhū luuñ hoñToñ se to dariyā ko bhī sahrā kar duuñ

pyaas terī mire hoñToñ pe samā.ī huī hai

shahar-e-vīrān ab ābād huā chāhtā hai

aaj is panchhī kī piñjre se rihā.ī huī hai

bārish-e-ashk meñ bah jā.egā ab shahr kā shahr

aaj 'āfāq' koī chiiz parā.ī huī hai

ye himaqat mere idrak pe chhai hui hai

aansuon se tere taswir banai hui hai

'arsh hilne ka sabab puchhte kya ho mujh se

ek du'a halqa-e-tasir mein aai hui hai

chand maddham hai diye chup hain sahar ruTh gai

kya mere gham mein giraftar KHudai hui hai

tum to bas tark-e-ta'alluq ke liye aa hi gae

ab ke is dil ne magar baat baDhai hui hai

munkashif hone laga KHun hatheli pe mere

ek laDki ki hatheli jo hinai hui hai

itni wahshat ki hawas wajd mein aane se rahi

ek sada jaanib-e-aflak se aai hui hai

chhu lun honTon se to dariya ko bhi sahra kar dun

pyas teri mere honTon pe samai hui hai

shahar-e-viran ab aabaad hua chahta hai

aaj is panchhi ki pinjre se rihai hui hai

barish-e-ashk mein bah jaega ab shahr ka shahr

aaj 'afaq' koi chiz parai hui hai