ye hukm hai ki andhere ko raushni samjho

ye hukm hai ki añdhere ko raushnī samjho

mile nasheb to koh-o-daman kī baat karo

nahīñ hai mai na sahī chashm-e-iltifāt to hai

na.ī hai bazm tarīq-e-kuhan kī baat karo

fareb-ḳhurda-e-manzil haiñ ham ko kyā mālūm

ba-tarz-e-rāhbarī rāhzan kī baat karo

ḳhizāñ ne aa ke kahā mere ġham se kyā hāsil

jahāñ bahār luTī us chaman kī baat karo

qadam qadam pe farozāñ haiñ āñsuoñ ke charāġh

unheñ bujhāo to sub.h-e-vatan kī baat karo

bahār aa.e to chup chaap hī guzar jaa.e

na rañg-o-bū kī na sarv-o-saman kī baat karo

ye hukm hai ki andhere ko raushni samjho

mile nasheb to koh-o-daman ki baat karo

nahin hai mai na sahi chashm-e-iltifat to hai

nai hai bazm tariq-e-kuhan ki baat karo

fareb-KHurda-e-manzil hain hum ko kya malum

ba-tarz-e-rahbari rahzan ki baat karo

KHizan ne aa ke kaha mere gham se kya hasil

jahan bahaar luTi us chaman ki baat karo

qadam qadam pe farozan hain aansuon ke charagh

unhen bujhao to subh-e-watan ki baat karo

bahaar aae to chup chap hi guzar jae

na rang-o-bu ki na sarw-o-saman ki baat karo