ye intiha-e-junun hai ki ghair hi sa laga

ye intihā-e-junūñ hai ki ġhair hī sā lagā

jo āshnā thā kabhī aaj ajnabī sā lagā

vo ek saaya jo behis thā murde kī mānind

qarīb aayā to ik aks-e-zindagī sā lagā

ḳhud apnī laash liye phir rahā thā kāñdhoñ par

vo aadmī to na thā phir bhī aadmī sā lagā

vo ik vajūd jo paale hue thā sāñpoñ ko

nazar kī zad meñ jo aayā to bāñsurī sā lagā

tamām umr jise paik-e-dostī samjhā

huā jo tajraba vo naqsh-e-dushmanī sā lagā

vo ek karb-e-musalsal jo dil jalātā thā

tum aa ke paas jo baiThe to sarḳhushī sā lagā

ba-zāhir ek hī chehra thā sāmne lekin

kabhī kisī kā lagā to kabhī kisī kā lagā

mire shu.ūr kī kam-mā.igī ki ai 'sādiq'

yaqīn bhī kabhī tasvīr-e-vahm hī sā lagā

ye intiha-e-junun hai ki ghair hi sa laga

jo aashna tha kabhi aaj ajnabi sa laga

wo ek saya jo behis tha murde ki manind

qarib aaya to ek aks-e-zindagi sa laga

KHud apni lash liye phir raha tha kandhon par

wo aadmi to na tha phir bhi aadmi sa laga

wo ek wajud jo pale hue tha sanpon ko

nazar ki zad mein jo aaya to bansuri sa laga

tamam umr jise paik-e-dosti samjha

hua jo tajraba wo naqsh-e-dushmani sa laga

wo ek karb-e-musalsal jo dil jalata tha

tum aa ke pas jo baiThe to sarKHushi sa laga

ba-zahir ek hi chehra tha samne lekin

kabhi kisi ka laga to kabhi kisi ka laga

mere shuur ki kam-maigi ki ai 'sadiq'

yaqin bhi kabhi taswir-e-wahm hi sa laga