ye izn-e-am hai ai waizo aao wuzu kar lo

ye izn-e-ām hai ai vā.izo aao vuzū kar lo

ḳhudā kā naam le kar bai.at-e-dast-e-subū kar lo

guloñ kī chaak dāmānī pe kyuuñ jaate ho dīvāno

ḳhud apne hī jigar ke chaak to pahle rafū kar lo

ye bazm-e-mai hai yaañ piinā pilānā hī ibādat hai

ijāzat hai agar chāho ḳhudā ko rū-ba-rū kar lo

kalīm aao to mere saath tum bhī tūr-e-sīnā tak

zarā is dushman-e-īmān-o-dīñ se guftugū kar lo

ḳhudā jaane ye kaisī aag hai ham ne mohabbat meñ

yahī dekhā ki dil ko ḳhaak kar lo yā lahū kar lo

yuuñ hī rote rahoge umr bhar merī tarah 'rif.at'

kahīñ aisā na ho tum bhī kisī kī aarzū kar lo

ye izn-e-am hai ai waizo aao wuzu kar lo

KHuda ka nam le kar baiat-e-dast-e-subu kar lo

gulon ki chaak damani pe kyun jate ho diwano

KHud apne hi jigar ke chaak to pahle rafu kar lo

ye bazm-e-mai hai yan pina pilana hi ibaadat hai

ijazat hai agar chaho KHuda ko ru-ba-ru kar lo

kalim aao to mere sath tum bhi tur-e-sina tak

zara is dushman-e-iman-o-din se guftugu kar lo

KHuda jaane ye kaisi aag hai hum ne mohabbat mein

yahi dekha ki dil ko KHak kar lo ya lahu kar lo

yun hi rote rahoge umr bhar meri tarah 'rifat'

kahin aisa na ho tum bhi kisi ki aarzu kar lo