ye izn-e-jast faqat ek bahana hota hai

ye izn-e-jast faqat ik bahāna hotā hai

kahāñ Thaharte haiñ vo jin ko jaanā hotā hai

hamāre sar pe mohabbat kā itnā bojh na Daal

hameñ ma.āsh kā dukh bhī uThānā hotā hai

jahāñ pe soḳhta jazbāt rakhe jaate haiñ

har ek dil meñ kahīñ sard-ḳhāna hotā hai

hamāre tazkire sadiyoñ laboñ pe rahte haiñ

hamāre din nahīñ hote zamāna hotā hai

tū mo'tariz na ho itnā malāl-e-besh-bahā

kabhī kabhī to hameñ muskurānā hotā hai

uḌā le jaatī hai mujh ko vahāñ samay kī havā

jahāñ kahīñ bhī mirā āb-o-dāna hotā hai

kisī ko laatī hai rāhoñ meñ kachche ghar kī ḳhalish

koī safar pe ḳhushī se ravāna hotā hai

khule-kivāḌ alāmat haiñ aas kī lekin

havā ke ruḳh pe diyā bhī jalānā hotā hai

hamāre haal pe jaisī guzar rahī ho 'hasan'

hameñ ravayya bhī vaisā banānā hotā hai

ye izn-e-jast faqat ek bahana hota hai

kahan Thaharte hain wo jin ko jaana hota hai

hamare sar pe mohabbat ka itna bojh na Dal

hamein maash ka dukh bhi uThana hota hai

jahan pe soKHta jazbaat rakhe jate hain

har ek dil mein kahin sard-KHana hota hai

hamare tazkire sadiyon labon pe rahte hain

hamare din nahin hote zamana hota hai

tu mo'tariz na ho itna malal-e-besh-baha

kabhi kabhi to hamein muskurana hota hai

uDa le jati hai mujh ko wahan samay ki hawa

jahan kahin bhi mera aab-o-dana hota hai

kisi ko lati hai rahon mein kachche ghar ki KHalish

koi safar pe KHushi se rawana hota hai

khule-kiwaD alamat hain aas ki lekin

hawa ke ruKH pe diya bhi jalana hota hai

hamare haal pe jaisi guzar rahi ho 'hasan'

hamein rawayya bhi waisa banana hota hai