ye jaisa kahte hain waisa nahin hai

ye jaisā kahte haiñ vaisā nahīñ hai

mohabbat se tumheñ ḳhatra nahīñ hai

hai nākāmī mirī yā kāmyābī

use mujh se gila hotā nahīñ hai

maiñ us kā muntazir huuñ muddatoñ se

jise merī taraf aanā nahīñ hai

haiñ zindābād ummīdeñ tumhārī

hamārā dil abhī baiThā nahīñ hai

mohabbat se nikal aa.e the aur ab

kahīñ par bhī sukūñ miltā nahīñ hai

bhale jaisā ravā rakkho ravayya

mujhe bas chhoḌ kar jaanā nahīñ hai

usī ke paas baiThe rahte haiñ ham

hamāre paas jo hotā nahīñ hai

'figār' us ko du'ā.eñ do ki us ne

kahīñ kā bhī tumheñ chhoḌā nahīñ hai

ye jaisa kahte hain waisa nahin hai

mohabbat se tumhein KHatra nahin hai

hai nakaami meri ya kaamyabi

use mujh se gila hota nahin hai

main us ka muntazir hun muddaton se

jise meri taraf aana nahin hai

hain zindabaad ummiden tumhaari

hamara dil abhi baiTha nahin hai

mohabbat se nikal aae the aur ab

kahin par bhi sukun milta nahin hai

bhale jaisa rawa rakkho rawayya

mujhe bas chhoD kar jaana nahin hai

usi ke pas baiThe rahte hain hum

hamare pas jo hota nahin hai

'figar' us ko du'aen do ki us ne

kahin ka bhi tumhein chhoDa nahin hai