ye jhuT hai ki bichhaDne ka usko gham bhi nahin

ye jhuuT hai ki bichhaḌne kā us ko ġham bhī nahīñ

vo ro rahā hai magar us kī aañkh nam bhī nahīñ

ye baat sach hai ki vo zindagī nahīñ merī

magar vo mere liye zindagī se kam bhī nahīñ

tujhe pata hī nahīñ merī raah kaisī hai

tū chal sakegā mire saath do qadam bhī nahīñ

ye kyā ki lagtā hai ab sab ko ḳhālī ḳhālī sā

mire alāva koī chiiz ghar meñ kam bhī nahīñ

maiñ tujh se jhuk ke milā huuñ magar ye dhyān rahe

baḌā nahīñ huuñ magar tujh se qad meñ kam bhī nahīñ

shanāḳht us kī alag hai mirā vajūd alag

judā bhī mujh se nahīñ hai vo mujh meñ zam bhī nahīñ

ye jhuT hai ki bichhaDne ka us ko gham bhi nahin

wo ro raha hai magar us ki aankh nam bhi nahin

ye baat sach hai ki wo zindagi nahin meri

magar wo mere liye zindagi se kam bhi nahin

tujhe pata hi nahin meri rah kaisi hai

tu chal sakega mere sath do qadam bhi nahin

ye kya ki lagta hai ab sab ko KHali KHali sa

mere alawa koi chiz ghar mein kam bhi nahin

main tujh se jhuk ke mila hun magar ye dhyan rahe

baDa nahin hun magar tujh se qad mein kam bhi nahin

shanaKHt us ki alag hai mera wajud alag

juda bhi mujh se nahin hai wo mujh mein zam bhi nahin