ye jo apne hath mein daman sambhaale jate hain

ye jo apne haath meñ dāman sambhāle jaate haiñ

pīchhe pīchhe in ke, in par marne vaale jaate haiñ

lutf o ranjish kā tamāshā hai ki din meñ laakh baar

gah bulā.e jaate haiñ ham gah nikāle jaate haiñ

jaan se jaate rahe haiñ bas-ki lākhoñ be-gunāh

har taraf kūche meñ us ke ḳhuuñ ke naale jaate haiñ

sa.ī tū apnī na kar ai girya sarf-e-shist-o-shū

dil ke dhone se koī ye daaġh kaale jaate haiñ

gar nahīñ hai va.ada gah vo ko to kyuuñ rātoñ ko log

us ke kūche meñ añdhere aur ujāle jaate haiñ

us ke kānoñ tak rasā.ī kyuuñ nahīñ hairān huuñ

arsh-e-a.azam tak to mere shab ke naale jaate haiñ

ho gayā huuñ maiñ to un kā 'mus.hafī' halqa-ba-gosh

yaad se merī kab un kānoñ ke baale jaate haiñ

ye jo apne hath mein daman sambhaale jate hain

pichhe pichhe in ke, in par marne wale jate hain

lutf o ranjish ka tamasha hai ki din mein lakh bar

gah bulae jate hain hum gah nikale jate hain

jaan se jate rahe hain bas-ki lakhon be-gunah

har taraf kuche mein us ke KHun ke nale jate hain

sai tu apni na kar ai girya sarf-e-shist-o-shu

dil ke dhone se koi ye dagh kale jate hain

gar nahin hai wada gah wo ko to kyun raaton ko log

us ke kuche mein andhere aur ujale jate hain

us ke kanon tak rasai kyun nahin hairan hun

arsh-e-azam tak to mere shab ke nale jate hain

ho gaya hun main to un ka 'mushafi' halqa-ba-gosh

yaad se meri kab un kanon ke baale jate hain