ye jo har shai meñ tirī jalvagarī hai ai dost
ye bhī merī vasī-un-nazarī hai ai dost
ḳhanda-e-gul hai jo zaḳhm-e-jigarī hai ai dost
mauj-e-ġham mauj-e-nasīm-saharī hai ai dost
terī firdaus-ḳhayālī ho mubārak tujh ko
merī jannat mire dāman kī tarī hai ai dost
kyā samā.e ġham-e-insāñ nigah-e-insāñ meñ
arsh-paimā.ī bhī fahm-basharī hai ai dost
mujh ko aatā hai musībat meñ ġhazal-ḳhvāñ honā
merī me'rāj mirī be-hunarī hai ai dost
jis ko kahte haiñ tirī yaad meñ gum ho jaanā
vo bhī ik silsila-e-bā-ḳhabarī hai ai dost
toḌ kar mujh ko zarā ā.īna-e-qalb hazār
kitnā majbūr fan-e-shīsha-garī hai ai dost
ye jo har shai mein teri jalwagari hai ai dost
ye bhi meri wasi-un-nazari hai ai dost
KHanda-e-gul hai jo zaKHm-e-jigari hai ai dost
mauj-e-gham mauj-e-nasim-sahari hai ai dost
teri firdaus-KHayali ho mubarak tujh ko
meri jannat mere daman ki tari hai ai dost
kya samae gham-e-insan nigah-e-insan mein
arsh-paimai bhi fahm-bashari hai ai dost
mujh ko aata hai musibat mein ghazal-KHwan hona
meri me'raj meri be-hunari hai ai dost
jis ko kahte hain teri yaad mein gum ho jaana
wo bhi ek silsila-e-ba-KHabari hai ai dost
toD kar mujh ko zara aaina-e-qalb hazar
kitna majbur fan-e-shisha-gari hai ai dost
Source:
Naqeeb-e-Sahar (Pg. e-27 p-26)
-
- Publisher: Kul Hind Hindi Urdu Sangam Lucknow
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.