ye jo ishq hai ye bala hai ya hai tilism ye ki kamal hai

ye jo 'ishq hai ye balā hai yā hai tilism ye ki kamāl hai

go ye zindagī kā 'urūj hai yahī zindagī kā zavāl hai

hai jo raat din tirī aarzū ye jo har ghaḌī tirī justujū

ise kyā kahūñ ki ye silsila ḳhud-aziyyatī kī misāl hai

yuuñ hī gungunātā hai dil mirā hai bharam kī tū hai yahāñ kahīñ

mujhe hai ḳhabar tū yahāñ nahīñ ye to mausamoñ kī hī chaal hai

thī 'ajab sī maañg huzūr kī raheñ paas bhī zarā duur bhī

huā ye natīja ki ab jo hai na to hijr hai na visāl hai

vahī uljhī uljhī sī guftugū koī khel hai ye ki chaal hai

tujhe jab bhī pūchhūñ maiñ kuchh kabhī tirā har javāb savāl hai

tū nahīñ yahāñ tirī yaad hai tirā hijr merī hayāt ab

tū na ho ke bhī mire paas hai ye mohabbatoñ kā kamāl hai

ye jo 'ishq hai ye bala hai ya hai tilism ye ki kamal hai

go ye zindagi ka 'uruj hai yahi zindagi ka zawal hai

hai jo raat din teri aarzu ye jo har ghaDi teri justuju

ise kya kahun ki ye silsila KHud-aziyyati ki misal hai

yun hi gungunata hai dil mera hai bharam ki tu hai yahan kahin

mujhe hai KHabar tu yahan nahin ye to mausamon ki hi chaal hai

thi 'ajab si mang huzur ki rahen pas bhi zara dur bhi

hua ye natija ki ab jo hai na to hijr hai na visal hai

wahi uljhi uljhi si guftugu koi khel hai ye ki chaal hai

tujhe jab bhi puchhun main kuchh kabhi tera har jawab sawal hai

tu nahin yahan teri yaad hai tera hijr meri hayat ab

tu na ho ke bhi mere pas hai ye mohabbaton ka kamal hai