ye jo kaam rah gae hain unhen rakh ke ja rahi hun

ye jo kaam rah ga.e haiñ unheñ rakh ke jā rahī huuñ

mirī zindagī maiñ tujh se bahut thak ke jā rahī huuñ

yahī dard ke basere yahī hijr ke añdhere

ye jo siskiyāñ haiñ saarī maiñ thapak ke jā rahī huuñ

faqat ek saañs mohlat magar imtihān itne

ye jo talḳhiyāñ thiiñ terī unheñ chakh ke jā rahī huuñ

mirī pyaas kā muqaddar to ye tishnagī hī Thahrī

ġham-e-ishq kī thī chhāgal maiñ chhalak ke jā rahī huuñ

jahāñ us ne muḌ ke dekhā vahīñ zindagī rukī thī

ye jo hairateñ haiñ dil kī maiñ jhaTak ke jā rahī huuñ

tirī ḳhushbuoñ se mahkeñ mire ḳhvāb ke jazīre

yahī aarzū thī lekin maiñ thapak ke jā rahī huuñ

tire lams se shanāsā nahīñ uñgliyāñ ye merī

tire hijr kī zamīñ par maiñ sisak ke jā rahī huuñ

mirī zindagī tū kah de kabhī jā ke chāragar se

ki ye ḳhvāb kā hai madfan maiñ bilak ke jā rahī huuñ

kisī aag meñ jalī tū kisī shaam meñ Dhalī maiñ

nahīñ ruuh to badan meñ so ThiThak ke jā rahī huuñ

ye jo kaam rah gae hain unhen rakh ke ja rahi hun

meri zindagi main tujh se bahut thak ke ja rahi hun

yahi dard ke basere yahi hijr ke andhere

ye jo siskiyan hain sari main thapak ke ja rahi hun

faqat ek sans mohlat magar imtihan itne

ye jo talKHiyan thin teri unhen chakh ke ja rahi hun

meri pyas ka muqaddar to ye tishnagi hi Thahri

gham-e-ishq ki thi chhagal main chhalak ke ja rahi hun

jahan us ne muD ke dekha wahin zindagi ruki thi

ye jo hairaten hain dil ki main jhaTak ke ja rahi hun

teri KHushbuon se mahken mere KHwab ke jazire

yahi aarzu thi lekin main thapak ke ja rahi hun

tere lams se shanasa nahin ungliyan ye meri

tere hijr ki zamin par main sisak ke ja rahi hun

meri zindagi tu kah de kabhi ja ke chaaragar se

ki ye KHwab ka hai madfan main bilak ke ja rahi hun

kisi aag mein jali tu kisi sham mein Dhali main

nahin ruh to badan mein so ThiThak ke ja rahi hun