ye jo main hun koi dhoka hi sahi yunhi sahi

ye jo maiñ huuñ koī dhoka hī sahī yūñhī sahī

jism kī qabr kā katba hī sahī yūñhī sahī

ḳhaak paḌtī rahī kitne hī zamānoñ kī magar

zaḳhm-e-dil aaj bhī taaza hī sahī yūñhī sahī

dar-o-dīvār se lipTā huā ye sannāTā

shor kartā huā qissa hī sahī yūñhī sahī

āḳhir-e-kār mujhe raakh to ho jaanā hai

ek pal ke liye sho'la hī sahī yūñhī sahī

ġham-e-duniyā bhī mire dil ke samundar meñ girā

aaj kuchh dard ziyāda hī sahī yūñhī sahī

kam se kam us se mulāqāt to ho jaatī hai

ḳhvāb hujre kā darīcha hī sahī yūñhī sahī

is kī chhāñv tale purkhoñ ke zamāne guzre

har shajar sūrat-e-shajara hī sahī yūñhī sahī

yaad aatā hai koī tark-e-ta.alluq par bhī

aur ye baat hamesha hī sahī yūñhī sahī

mutma.in huuñ ki koī to mirā nigrāñ hai 'zafar'

mere pīchhe mirā saaya hī sahī yūñhī sahī

ye jo main hun koi dhoka hi sahi yunhi sahi

jism ki qabr ka katba hi sahi yunhi sahi

KHak paDti rahi kitne hi zamanon ki magar

zaKHm-e-dil aaj bhi taza hi sahi yunhi sahi

dar-o-diwar se lipTa hua ye sannaTa

shor karta hua qissa hi sahi yunhi sahi

aaKHir-e-kar mujhe rakh to ho jaana hai

ek pal ke liye sho'la hi sahi yunhi sahi

gham-e-duniya bhi mere dil ke samundar mein gira

aaj kuchh dard ziyaada hi sahi yunhi sahi

kam se kam us se mulaqat to ho jati hai

KHwab hujre ka daricha hi sahi yunhi sahi

is ki chhanw tale purkhon ke zamane guzre

har shajar surat-e-shajara hi sahi yunhi sahi

yaad aata hai koi tark-e-talluq par bhi

aur ye baat hamesha hi sahi yunhi sahi

mutmain hun ki koi to mera nigran hai 'zafar'

mere pichhe mera saya hi sahi yunhi sahi