ye junun-e-ishq kaam aa hi gaya

ye junūn-e-ishq kaam aa hī gayā

un ke dīvānoñ meñ naam aa hī gayā

ārzū-e-pā.emālī muzhda-bād

vo but-e-mahshar-ḳhirām aa hī gayā

al-madad shauq-e-shahādat phir koī

le ke teġh-e-be-niyām aa hī gayā

go tahī thā maiñ usī par shaad huuñ

mujh tak āḳhir daur-e-jām aa hī gayā

lo uThe parde harīm-e-nāz kai

lo vo hukm-e-qatl-e-ām aa hī gayā

uTh ga.ī āḳhir nigāh-e-sharmagīñ

jazb-e-dil ik roz kaam aa hī gayā

chashm-e-qātil ne ishāra kar dayā

hasratoñ kā iḳhtitām aa hī gayā

intihā-e-rañj meñ terā ḳhayāl

ban ke rāhat kā payām aa hī gayā

ho ga.ī maqbūl rindoñ kī duā

dekh lo gardish meñ jaam aa hī gayā

ārzūoñ par lagā dī bandisheñ

ham ko dil kā intizām aa hī gayā

ban gayā 'nāmī' ġhubār-e-rāh-e-dost

kuchh dil-e-marhūm kaam aa hī gayā

ye junun-e-ishq kaam aa hi gaya

un ke diwanon mein nam aa hi gaya

aarzu-e-paemali muzhda-baad

wo but-e-mahshar-KHiram aa hi gaya

al-madad shauq-e-shahadat phir koi

le ke tegh-e-be-niyam aa hi gaya

go tahi tha main usi par shad hun

mujh tak aaKHir daur-e-jam aa hi gaya

lo uThe parde harim-e-naz kai

lo wo hukm-e-qatl-e-am aa hi gaya

uTh gai aaKHir nigah-e-sharmagin

jazb-e-dil ek roz kaam aa hi gaya

chashm-e-qatil ne ishaara kar daya

hasraton ka iKHtitam aa hi gaya

intiha-e-ranj mein tera KHayal

ban ke rahat ka payam aa hi gaya

ho gai maqbul rindon ki dua

dekh lo gardish mein jam aa hi gaya

aarzuon par laga di bandishen

hum ko dil ka intizam aa hi gaya

ban gaya 'nami' ghubar-e-rah-e-dost

kuchh dil-e-marhum kaam aa hi gaya