ye kaenati zehanat ka daur hai bhai

ye kā.enātī zehānat kā daur hai bhaa.ī

yahāñ ḳhudā kā tasavvur kuchh aur hai bhaa.ī

sunāo kaise ho kaise haiñ chāñd par hālāt

zamīn par to vahī zulm-o-jaur hai bhaa.ī

koī palak bhī jhapaktā nahīñ tamāshe meñ

madāriyoñ kā tilismāna taur hai bhaa.ī

vatan kī sub.h se hijrat kī raat duur nahīñ

hirā se chañd qadam ġhār-e-saur hai bhaa.ī

tumheñ to izn-e-safar mil chukā mubārak ho

hamārā naam abhī zer-e-ġhaur hai bhaa.ī

jo kā.enāt kī chhat se nazar karo 'shāhid'

vahāñ se ālam-e-hairat hī aur hai bhaa.ī

ye kaenati zehanat ka daur hai bhai

yahan KHuda ka tasawwur kuchh aur hai bhai

sunao kaise ho kaise hain chand par haalat

zamin par to wahi zulm-o-jaur hai bhai

koi palak bhi jhapakta nahin tamashe mein

madariyon ka tilismana taur hai bhai

watan ki subh se hijrat ki raat dur nahin

hira se chand qadam ghaar-e-saur hai bhai

tumhein to izn-e-safar mil chuka mubarak ho

hamara nam abhi zer-e-ghaur hai bhai

jo kaenat ki chhat se nazar karo 'shahid'

wahan se aalam-e-hairat hi aur hai bhai