ye kafir but jinhen dawa hai duniya mein KHudai ka

ye kāfir but jinheñ da.avā hai duniyā meñ ḳhudā.ī kā

mileñ mahshar meñ mujh aasī ko sadqa kibriyā.ī kā

ye mujh se saḳht-jāñ par shauq ḳhanjar-āzmā.ī kā

ḳhudā-hāfiz mire qātil tirī nāzuk kalā.ī kā

na ho pahlū meñ mere dil to koī baat kyuuñ pūchhe

yahī to ik zarīya hai hasīnoñ tak rasā.ī kā

tum achchhe ġhair achchhā ġhair kī taqdīr bhī achchhī

ye āḳhir zikr kyuuñ hai merī qismat kī burā.ī kā

vo kyā so.eñge ġhāfil ho ke shab bhar mare pahlū meñ

unheñ ye fikr hai nikle koī pahlū laḌā.ī kā

hazāroñ dīda-o-dil-e-bām lākhoñ tuur se baḌh kar

karoḌoñ jalva-gāheñ shauq to ho ḳhud-numā.ī kā

qafas meñ ab kahāñ vo imbisāt-e-sub.h-e-āzādī

chaman tak lutf thā sayyād merī ḳhush-navā.ī kā

ishāre par tire chal kar ye laa.e rañg mushkil hai

abhī mohtāj hai ḳhanjar tire dast-e-hinā.ī kā

koī kyā jaa.e jannat meñ ki us ne tuul khīñchā hai

qayāmat par bhī saaya paḌ gayā roz-e-judā.ī kā

vo din bhī aa.e ham hoñ aur galiyāñ hoñ madīne kī

gadāyāna sadā ho haath meñ kaasa gadā.ī kā

banā.ī kyā burī gat mai-kade meñ bāda-noshoñ ne

'riyāz' aa.e the kal jaama pahan kar pārsā.ī kā

ye kafir but jinhen dawa hai duniya mein KHudai ka

milen mahshar mein mujh aasi ko sadqa kibriyai ka

ye mujh se saKHt-jaan par shauq KHanjar-azmai ka

KHuda-hafiz mere qatil teri nazuk kalai ka

na ho pahlu mein mere dil to koi baat kyun puchhe

yahi to ek zariya hai hasinon tak rasai ka

tum achchhe ghair achchha ghair ki taqdir bhi achchhi

ye aaKHir zikr kyun hai meri qismat ki burai ka

wo kya soenge ghafil ho ke shab bhar mare pahlu mein

unhen ye fikr hai nikle koi pahlu laDai ka

hazaron dida-o-dil-e-baam lakhon tur se baDh kar

karoDon jalwa-gahen shauq to ho KHud-numai ka

qafas mein ab kahan wo imbisat-e-subh-e-azadi

chaman tak lutf tha sayyaad meri KHush-nawai ka

ishaare par tere chal kar ye lae rang mushkil hai

abhi mohtaj hai KHanjar tere dast-e-hinai ka

koi kya jae jannat mein ki us ne tul khincha hai

qayamat par bhi saya paD gaya roz-e-judai ka

wo din bhi aae hum hon aur galiyan hon madine ki

gadayana sada ho hath mein kasa gadai ka

banai kya buri gat mai-kade mein baada-noshon ne

'riyaz' aae the kal jama pahan kar parsai ka