ye kahkashan ye sitare ye chandni ye bahaar

ye kahkashāñ ye sitāre ye chāñdnī ye bahār

nigāh maiñ na uThā.ūñ to sab ke sab bekār

ye māntā huuñ ki aa.ī chaman meñ fasl-e-bahār

liye hue magar apne jilau meñ barq-o-sharār

payām-e-daur-e-ḳhizāñ hai varūd-e-fasl-e-bahār

ḳhudā ke vāste ahl-e-chaman zarā hushiyār

abhī nigāh se kuchh aur kaam lene haiñ

ḳhudā kare ki na ho aap kā mujhe dīdār

abhī to kākul-e-getī meñ zehn ġhaltāñ hai

tumhārī zulf se uljheñ bhī kyoñ mire afkār

unhīñ ko bā.is-e-zulmat qarār dete ho

hai jin ke dam se munavvar fazā-e-tīra-o-tār

fusūn-e-tīrgī-e-shab hai TūTne vaalā

vo sub.h-e-nau ke nazar aa rahe haiñ kuchh āsār

ye iḳhtiyār-e-vafā hai mujhe pashemānī

tumhāre jabr-e-musalsal se maiñ nahīñ bezār

'atīq' merī pareshāniyāñ ma.āz-allāh

ki jaise ek masīhā hazār-hā bīmār

ye kahkashan ye sitare ye chandni ye bahaar

nigah main na uThaun to sab ke sab bekar

ye manta hun ki aai chaman mein fasl-e-bahaar

liye hue magar apne jilau mein barq-o-sharar

payam-e-daur-e-KHizan hai warud-e-fasl-e-bahaar

KHuda ke waste ahl-e-chaman zara hushiyar

abhi nigah se kuchh aur kaam lene hain

KHuda kare ki na ho aap ka mujhe didar

abhi to kakul-e-geti mein zehn ghaltan hai

tumhaari zulf se uljhen bhi kyon mere afkar

unhin ko bais-e-zulmat qarar dete ho

hai jin ke dam se munawwar faza-e-tira-o-tar

fusun-e-tirgi-e-shab hai TuTne wala

wo subh-e-nau ke nazar aa rahe hain kuchh aasar

ye iKHtiyar-e-wafa hai mujhe pashemani

tumhaare jabr-e-musalsal se main nahin bezar

'atiq' meri pareshaniyan maaz-allah

ki jaise ek masiha hazar-ha bimar