ye kaif-e-husn us pe ye masti shabab ki

ye kaif-e-husn us pe ye mastī shabāb kī

ye aap haiñ ki mauj hai koī sharāb kī

suunī hai bazm-e-ālam-e-imkāñ tire baġhair

zulmat hai raushnī bhī shab-e-māhtāb kī

kyoñ merī laġhzishoñ pa zamāna hai ta.ana-zan

sab laġhzisheñ muaaf haiñ ahd-e-shabāb kī

zauq-e-salīm chāhiye shā.ir ke vāste

hājat hai mai-kashī kī na fan par kitāb kī

vo sard sard aaheñ vo aḳhtar-shumāriyāñ

dilchaspiyāñ thiiñ ye mire ahd-e-shabāb kī

jazbāt-e-husn-o-ishq se labrez ye ġhazal

tasvīr hai kisī dil-e-ḳhāna-ḳharāb kī

kaif-āfrīñ hai merā ġham-e-ishq ai 'bahār'

lazzat na mujh se pūchh tū aise azaab kī

ye kaif-e-husn us pe ye masti shabab ki

ye aap hain ki mauj hai koi sharab ki

suni hai bazm-e-alam-e-imkan tere baghair

zulmat hai raushni bhi shab-e-mahtab ki

kyon meri laghzishon pa zamana hai tana-zan

sab laghzishen muaf hain ahd-e-shabab ki

zauq-e-salim chahiye shair ke waste

hajat hai mai-kashi ki na fan par kitab ki

wo sard sard aahen wo aKHtar-shumariyan

dilchaspiyan thin ye mere ahd-e-shabab ki

jazbaat-e-husn-o-ishq se labrez ye ghazal

taswir hai kisi dil-e-KHana-KHarab ki

kaif-afrin hai mera gham-e-ishq ai 'bahaar'

lazzat na mujh se puchh tu aise azab ki