ye karen aur wo karen aisa karen waisa karen

ye kareñ aur vo kareñ aisā kareñ vaisā kareñ

zindagī do din kī hai do din meñ ham kyā kyā kareñ

dūsroñ se kab talak ham pyaas kā shikva kareñ

laao tesha ek dariyā dūsrā paidā kareñ

husn ḳhud aa.e tavāf-e-ishq karne ke liye

ishq vaale zindagī meñ husn to paidā kareñ

chaḌh ke suulī par ḳharīdeñge ḳharīdār aap ko

aap apne husn kā bāzār to ūñchā kareñ

jī meñ aatā hai ki deñ parde se parde kā javāb

ham se vo parda kareñ duniyā se ham pardā kareñ

sun rahā huuñ kuchh luTere aa ga.e haiñ shahr meñ

aap jaldī band apne ghar kā darvāza kareñ

kījiyegā rahzanī kab tak ba-nām-e-rahbarī

ab se behtar aap koī dūsrā dhandā kareñ

is purānī bevafā duniyā kā ronā kab talak

aa.iye mil-jul ke ik duniyā na.ī paidā kareñ

dil hameñ taḌpā.e to kaise na ham taḌpeñ 'nazīr'

dūsre ke bas meñ rah kar apnī vaalī kyā kareñ

ye karen aur wo karen aisa karen waisa karen

zindagi do din ki hai do din mein hum kya kya karen

dusron se kab talak hum pyas ka shikwa karen

lao tesha ek dariya dusra paida karen

husn KHud aae tawaf-e-ishq karne ke liye

ishq wale zindagi mein husn to paida karen

chaDh ke suli par KHaridenge KHaridar aap ko

aap apne husn ka bazar to uncha karen

ji mein aata hai ki den parde se parde ka jawab

hum se wo parda karen duniya se hum parda karen

sun raha hun kuchh luTere aa gae hain shahr mein

aap jaldi band apne ghar ka darwaza karen

kijiyega rahzani kab tak ba-nam-e-rahbari

ab se behtar aap koi dusra dhanda karen

is purani bewafa duniya ka rona kab talak

aaiye mil-jul ke ek duniya nai paida karen

dil hamein taDpae to kaise na hum taDpen 'nazir'

dusre ke bas mein rah kar apni wali kya karen