ye karishme bhi hue husn ki bauchhaaron se

ye karishme bhī hue husn kī bauchhāroñ se

peḌ ban kar badan ugne lage dīvāroñ se

kyoñ na be-qāmatī-e-ḳhāk pe ronā aa.e

jhuk ke miltā hai falak shahr ke mīnāroñ se

kis kī bātoñ ne gale chhed diye haiñ apne

gardaneñ ham to bachā laa.e the talvāroñ se

ye dukāneñ to unheñ roktī rah jaatī haiñ

jaane kyoñ log guzar jaate haiñ bāzāroñ se

phir mujhe aane lagā tark-e-sukūnat kā ḳhayāl

naddiyāñ jaise utar aa.ī hoñ kohsāroñ se

tū ne in ko kisī qābil hī na samjhā varna

hurmat-e-ishq thī sab tere gunahgāroñ se

aa paḌī sahn meñ kyoñ us kī zarūrat 'tābish'

vo to kahtā thā ki ghar bante haiñ dīvāroñ se

ye karishme bhi hue husn ki bauchhaaron se

peD ban kar badan ugne lage diwaron se

kyon na be-qamati-e-KHak pe rona aae

jhuk ke milta hai falak shahr ke minaron se

kis ki baaton ne gale chhed diye hain apne

gardanen hum to bacha lae the talwaron se

ye dukanen to unhen rokti rah jati hain

jaane kyon log guzar jate hain bazaron se

phir mujhe aane laga tark-e-sukunat ka KHayal

naddiyan jaise utar aai hon kohsaron se

tu ne in ko kisi qabil hi na samjha warna

hurmat-e-ishq thi sab tere gunahgaron se

aa paDi sahn mein kyon us ki zarurat 'tabish'

wo to kahta tha ki ghar bante hain diwaron se