ye kaun meri tishnagi baDha baDha ke chal diya

ye kaun merī tishnagī baḌhā baḌhā ke chal diyā

ki lau charāġh-e-dard kī baḌhā baḌhā ke chal diyā

ye merā dil hī jāntā hai kitnā sañg-dil hai vo

ki mujh se apnī dostī baḌhā baḌhā ke chal diyā

bichhaḌ ke us se zindagī vabāl-e-jān ho ga.ī

vo dil meñ shauq-e-ḳhud-kushī baḌhā baḌhā ke chal diyā

karūñ to ab maiñ kis se apnī vus.at-e-nazar kī baat

vo mujh meñ hiss-e-āgahī baḌhā baḌhā ke chal diyā

na diid kī umiid ab na lutf-e-naġhma-e-visāl

ki lai vo sāz-e-hijr kī baḌhā baḌhā ke chal diyā

vo aayā 'akbar' is adā se aaj mere sāmne

ki ik jhalak sī ḳhvāb kī dikhā dikhā ke chal diyā

ye kaun meri tishnagi baDha baDha ke chal diya

ki lau charagh-e-dard ki baDha baDha ke chal diya

ye mera dil hi jaanta hai kitna sang-dil hai wo

ki mujh se apni dosti baDha baDha ke chal diya

bichhaD ke us se zindagi wabaal-e-jaan ho gai

wo dil mein shauq-e-KHud-kushi baDha baDha ke chal diya

karun to ab main kis se apni wusat-e-nazar ki baat

wo mujh mein hiss-e-agahi baDha baDha ke chal diya

na did ki umid ab na lutf-e-naghma-e-visal

ki lai wo saz-e-hijr ki baDha baDha ke chal diya

wo aaya 'akbar' is ada se aaj mere samne

ki ek jhalak si KHwab ki dikha dikha ke chal diya