ye kaun sa parwana mua jal ke lagan mein

ye kaun sā parvāna muā jal ke lagan meñ

hairat se jo hai sham.a kī añgusht dahan meñ

kahte haiñ use chāh-e-zanaḳhdāñ ġhalatī se

bose kā nishāñ hai ye tire seb-e-zaqan meñ

vo ā.ina-tan aa.ina phir kis liye dekhe

jo dekh le muñh apnā har ik uzv-e-badan meñ

vo subah ko is Dar se nahīñ baam par aatā

naama na koī bāñdh de sūraj kī kiran meñ

mazmūñ nahīñ likhte ham use dāġh-e-jigar kā

rakh dete haiñ laale kī kalī ḳhat kī shikan meñ

ye gard-e-kudūrat se pas-e-marg thā dil saaf

dhabbā na lagā ḳhaak kā bhī mere kafan meñ

zindāñ meñ asīroñ se ye kahtā thā mah-e-misr

ġhurbat hī meñ ārām milā aur na vatan meñ

ye kaun sa parwana mua jal ke lagan mein

hairat se jo hai shama ki angusht dahan mein

kahte hain use chah-e-zanaKHdan ghalati se

bose ka nishan hai ye tere seb-e-zaqan mein

wo aaina-tan aaina phir kis liye dekhe

jo dekh le munh apna har ek uzw-e-badan mein

wo subah ko is Dar se nahin baam par aata

nama na koi bandh de suraj ki kiran mein

mazmun nahin likhte hum use dagh-e-jigar ka

rakh dete hain lale ki kali KHat ki shikan mein

ye gard-e-kudurat se pas-e-marg tha dil saf

dhabba na laga KHak ka bhi mere kafan mein

zindan mein asiron se ye kahta tha mah-e-misr

ghurbat hi mein aaram mila aur na watan mein