ye KHalwaton mein bhi sochte hain ki hum kahan se kahan hain aae

ye ḳhalvatoñ meñ bhī sochte haiñ ki ham kahāñ se kahāñ haiñ aa.e

ki rāh-e-manzil se kaise kaise hamesha ham ne fareb khaa.e

purāne qisse bhulā ke ham ne tumhāre va.adoñ pe aas bāñdhī

sunī haiñ ham ne bhī dāstāneñ magar kahāñ ham ne lab hilā.e

chitā jalī gar to ḳhvāhishoñ ke ga.e zamānoñ ne sar uThā.e

dil-e-hazīñ ko ye zid thī koī phir aa ke sham-e-vafā jalā.e

guzartī jaatī haiñ lambī sadiyāñ magar koī ham-suḳhan nahīñ hai

kabhī kabhī to ye ḳhāmushī bhī na jaane kyā kyā hameñ sunā.e

ye jānte haiñ ki luT chuke haiñ ka.ī dafa dil ke āstāne

magar abhī tak ham ārzūoñ kī bastiyāñ dil meñ haiñ basā.e

ye be-bahā āb-dār motī inheñ gañvāne se fā.eda kyā

agar nahīñ hai kuchh is kā hāsil to koī kyoñ ashk-e-ġham bahā.e

kabhī to iḳhfā-e-ġham kī ḳhātir bhī muskurānā paḌā hai ham ko

zamāna ab tak samajh na paayā ki ham ne kyoñ itne giit gaaye

ḳhayāl kī manziloñ se guzre gumān kī mahfileñ bhī dekhīñ

magar sitāroñ se aur aage jahāñ hai kaisā samajh na paa.e

banā hai ik ālam-e-tahayyur na.ī fazā hai nayā samāñ hai

hayāt ke ye ajiib lamhe na jaane kyā kyā payām laa.e

hujūm-e-ālām-o-ġham salāmat magar hai phir bhī koī ḳhalā sā

yahī to hai raaz zindagī kā batā.e 'hānī' to kyā batā.e

ye KHalwaton mein bhi sochte hain ki hum kahan se kahan hain aae

ki rah-e-manzil se kaise kaise hamesha hum ne fareb khae

purane qisse bhula ke hum ne tumhaare wadon pe aas bandhi

suni hain hum ne bhi dastanen magar kahan hum ne lab hilae

chita jali gar to KHwahishon ke gae zamanon ne sar uThae

dil-e-hazin ko ye zid thi koi phir aa ke sham-e-wafa jalae

guzarti jati hain lambi sadiyan magar koi ham-suKHan nahin hai

kabhi kabhi to ye KHamushi bhi na jaane kya kya hamein sunae

ye jaante hain ki luT chuke hain kai dafa dil ke aastane

magar abhi tak hum aarzuon ki bastiyan dil mein hain basae

ye be-baha aab-dar moti inhen ganwane se faeda kya

agar nahin hai kuchh is ka hasil to koi kyon ashk-e-gham bahae

kabhi to iKHfa-e-gham ki KHatir bhi muskurana paDa hai hum ko

zamana ab tak samajh na paya ki hum ne kyon itne git gaye

KHayal ki manzilon se guzre guman ki mahfilen bhi dekhin

magar sitaron se aur aage jahan hai kaisa samajh na pae

bana hai ek aalam-e-tahayyur nai faza hai naya saman hai

hayat ke ye ajib lamhe na jaane kya kya payam lae

hujum-e-alam-o-gham salamat magar hai phir bhi koi KHala sa

yahi to hai raaz zindagi ka batae 'hani' to kya batae