ye KHushi gham-e-zamana ka shikar ho na jae

ye ḳhushī ġham-e-zamāna kā shikār ho na jaa.e

na milo ziyāda ham se kahīñ pyaar ho na jaa.e

jo machal rahī hai shīshe meñ hasīn hai vo shabnam

mire lab tak aate aate jo sharār ho na jaa.e

na kaTeñ akele dil se ġham-e-zindagī kī rāheñ

jo sharīk-e-fikr-e-daurāñ ġham-e-yār ho na jaa.e

na baḌhā bahut chaman se rah-o-rasm-e-āshiyāna

ki mizāj-e-bāġhbāñ par kahīñ baar ho na jaa.e

tirī taaza muskurāhaT se bhar aa.ī aañkh yaanī

kahīñ ye nishān-e-manzil bhī ġhubār ho na jaa.e

jo qarīb hai kināra to baḌhā hai aur tūfāñ

ki ye saḳht-jān kashtī kahīñ paar ho na jaa.e

isī tarah ḳhūn-e-dil se tū chaman ko sīñchtā jā

ye ḳhizāñ 'shamīm' jab tak ki bahār ho na jaa.e

ye KHushi gham-e-zamana ka shikar ho na jae

na milo ziyaada hum se kahin pyar ho na jae

jo machal rahi hai shishe mein hasin hai wo shabnam

mere lab tak aate aate jo sharar ho na jae

na kaTen akele dil se gham-e-zindagi ki rahen

jo sharik-e-fikr-e-dauran gham-e-yar ho na jae

na baDha bahut chaman se rah-o-rasm-e-ashiyana

ki mizaj-e-baghban par kahin bar ho na jae

teri taza muskurahaT se bhar aai aankh yani

kahin ye nishan-e-manzil bhi ghubar ho na jae

jo qarib hai kinara to baDha hai aur tufan

ki ye saKHt-jaan kashti kahin par ho na jae

isi tarah KHun-e-dil se tu chaman ko sinchta ja

ye KHizan 'shamim' jab tak ki bahaar ho na jae