ye kis hasin ne logon ko rok rakkha hai

ye kis hasīn ne logoñ ko rok rakkhā hai

tamām shahr ke rastoñ ko rok rakkhā hai

nikal paḌeñ na kahīñ paane apnī ta.abīreñ

isī liye sabhī ḳhvāboñ ko rok rakkhā hai

vo kah rahe haiñ kaho dil kī baat baat magar

na jaane kyuuñ ka.ī bātoñ ko rok rakkhā hai

dalīleñ dene ko de sakte haiñ hazār magar

sabhī havāloñ javāzoñ ko rok rakkhā hai

abhī hayāt ke goshe chhupe hue haiñ bahut

kisī ne kyuuñ sabhī rañgoñ ko rok rakkhā hai

na apne-āp meñ ho jaa.e ġharq dariyā bhī

zamīñ ne kaise kināroñ ko rok rakkhā hai

na raaz faash kabhī hoñ zamīn vāloñ ke

falak ne chāñd sitāroñ ko rok rakkhā hai

tamām log hī pāgal na ho ke rah jaa.eñ

numā.ishoñ se hasīnoñ ko rok rakkhā hai

tamām shahr ko raushan na hone deñge kabhī

hamāre sīnoñ kī aagoñ ko rok rakkhā hai

diye bujhātī bhī haiñ to jalātī bhī haiñ yahī

ye kis ne tund havāoñ ko rok rakkhā hai

na kaam karne ke karte na karne dete haiñ

hamāre ḳhvāsoñ ne aamoñ ko rok rakkhā hai

hamārī rāhnumā.ī ko raste kaafī the

pa zulmatoñ ne bhī rastoñ ko rok rakkhā hai

kisī kisī ko hai haq zinda rahne kā hāsil

dukhoñ ne logoñ kī sāñsoñ ko rok rakkhā hai

bhale zamāne kī ummīd par abhī 'rūhī'

bahut zarūrī bhī kāmoñ ko rok rakkhā hai

ye kis hasin ne logon ko rok rakkha hai

tamam shahr ke raston ko rok rakkha hai

nikal paDen na kahin pane apni tabiren

isi liye sabhi KHwabon ko rok rakkha hai

wo kah rahe hain kaho dil ki baat baat magar

na jaane kyun kai baaton ko rok rakkha hai

dalilen dene ko de sakte hain hazar magar

sabhi hawalon jawazon ko rok rakkha hai

abhi hayat ke goshe chhupe hue hain bahut

kisi ne kyun sabhi rangon ko rok rakkha hai

na apne-ap mein ho jae gharq dariya bhi

zamin ne kaise kinaron ko rok rakkha hai

na raaz fash kabhi hon zamin walon ke

falak ne chand sitaron ko rok rakkha hai

tamam log hi pagal na ho ke rah jaen

numaishon se hasinon ko rok rakkha hai

tamam shahr ko raushan na hone denge kabhi

hamare sinon ki aagon ko rok rakkha hai

diye bujhati bhi hain to jalati bhi hain yahi

ye kis ne tund hawaon ko rok rakkha hai

na kaam karne ke karte na karne dete hain

hamare KHwason ne aamon ko rok rakkha hai

hamari rahnumai ko raste kafi the

pa zulmaton ne bhi raston ko rok rakkha hai

kisi kisi ko hai haq zinda rahne ka hasil

dukhon ne logon ki sanson ko rok rakkha hai

bhale zamane ki ummid par abhi 'ruhi'

bahut zaruri bhi kaamon ko rok rakkha hai