ye kis ke KHayal-e-nazuk se zehnon ka daricha raushan hai

ye kis ke ḳhayāl-e-nāzuk se zehnoñ kā darīcha raushan hai

ye kis ke aks-e-tabassum se ābād diloñ kā darpan hai

ehsās ke ġhunche khilte haiñ yādoñ kī hasīñ purvā.ī se

har shab ke shagufta pahlū meñ ḳhvāboñ kā mahaktā gulshan hai

ik husn-e-mujassam kā jab se āñkhoñ ne sarāpā chūmā hai

kuchh hosh nahīñ mad.hosh hue kuchh aql-o-ḳhirad se an-ban hai

ye rang-e-chaman ye bazm-e-suḳhan ye ālam-e-mastī raqs-o-tarab

ham jām-o-subū ko chalkā.eñ jab raat kā rangīñ dāman hai

is mahfil-e-ḳhūbāñ kā mai-kash kyā rang-o-samāñ hai mat pūchho

alfāz kī zarrīñ bārish hai naġhmāt kī har-sū chhan-chhan hai

ye kis ke KHayal-e-nazuk se zehnon ka daricha raushan hai

ye kis ke aks-e-tabassum se aabaad dilon ka darpan hai

ehsas ke ghunche khilte hain yaadon ki hasin purwai se

har shab ke shagufta pahlu mein KHwabon ka mahakta gulshan hai

ek husn-e-mujassam ka jab se aankhon ne sarapa chuma hai

kuchh hosh nahin madhosh hue kuchh aql-o-KHirad se an-ban hai

ye rang-e-chaman ye bazm-e-suKHan ye aalam-e-masti raqs-o-tarab

hum jam-o-subu ko chalkaen jab raat ka rangin daman hai

is mahfil-e-KHuban ka mai-kash kya rang-o-saman hai mat puchho

alfaz ki zarrin barish hai naghmat ki har-su chhan-chhan hai