ye kis ke nam se raushan tha goshwara-e-shab

ye kis ke naam se raushan thā goshvāra-e-shab

ki āsmāñ pe laraztā rahā sitāra-e-shab

tamām rū-e-nigārīñ dil-o-dar-o-dīvār

ki yād-e-mehr-e-nazar hāsil-e-ḳhasārā-e-shab

ḳhushā vo sarḳhushī-e-sā.at-e-shab-dīdār

kujā faroġh-e-mah-o-mai kujā nazāra-e-shab

shab-e-ġham-o-bar-e-shīrīn-e-jāñ salām tujhe

ḳhayāl abr se niklā hai māh-pāra-e-shab

nazar ulajhtī rahī ḳhāl-o-zulf se tā-der

samajh meñ aa gayā mafhūm-e-isti.āra-e-shab

firāq-e-yār se begānagī nahīñ sābit

ḳhayāl-e-vasl bhī hogā jo ho ishāra-e-shab

ye kis ke nam se raushan tha goshwara-e-shab

ki aasman pe larazta raha sitara-e-shab

tamam ru-e-nigarin dil-o-dar-o-diwar

ki yaad-e-mehr-e-nazar hasil-e-KHasara-e-shab

KHusha wo sarKHushi-e-saat-e-shab-didar

kuja farogh-e-mah-o-mai kuja nazara-e-shab

shab-e-gham-o-bar-e-shirin-e-jaan salam tujhe

KHayal abr se nikla hai mah-para-e-shab

nazar ulajhti rahi KHal-o-zulf se ta-der

samajh mein aa gaya mafhum-e-istiara-e-shab

firaq-e-yar se beganagi nahin sabit

KHayal-e-wasl bhi hoga jo ho ishaara-e-shab