ye kis muhim par chale the hum jis mein raste pur-KHatar na aae

ye kis muhim par chale the ham jis meñ rāste pur-ḳhatar na aa.e

hameñ navāzā na vahshatoñ ne hameñ junūñ ke hunar na aa.e

mujhe bahut tez dhuup darkār hai mohabbat ke is safar meñ

kabhī kahīñ sar pe saaya karne koī ghanerā shajar na aa.e

añdherī shab kā ye ḳhvāb-manzar mujhe ujāloñ se bhar rahā hai

to raat itnī tavīl ho jaa.e tā-qayāmat sahar na aa.e

jahāñ hoñ terī hī raunaqeñ aur tire nazāre hī chāroñ jānib

us anjuman kā patā batā de jahāñ se merī ḳhabar na aa.e

jo lauT aa.e koī safar se to phir musāfir kahāñ rahā vo

vahī musāfir hai jo safar meñ hai aur kabhī lauT kar na aa.e

vo āsmānoñ meñ rahne vaalā sunegā ik din tirī 'alīnā'

sadā ko apnī buland rakh tū duā meñ jab tak asar na aa.e

ye kis muhim par chale the hum jis mein raste pur-KHatar na aae

hamein nawaza na wahshaton ne hamein junun ke hunar na aae

mujhe bahut tez dhup darkar hai mohabbat ke is safar mein

kabhi kahin sar pe saya karne koi ghanera shajar na aae

andheri shab ka ye KHwab-manzar mujhe ujalon se bhar raha hai

to raat itni tawil ho jae ta-qayamat sahar na aae

jahan hon teri hi raunaqen aur tere nazare hi chaaron jaanib

us anjuman ka pata bata de jahan se meri KHabar na aae

jo lauT aae koi safar se to phir musafir kahan raha wo

wahi musafir hai jo safar mein hai aur kabhi lauT kar na aae

wo aasmanon mein rahne wala sunega ek din teri 'alina'

sada ko apni buland rakh tu dua mein jab tak asar na aae