ye kis ne tum se ghalat kaha mujhe karwan ki talash hai

ye kis ne tum se ġhalat kahā mujhe kārvāñ kī talāsh hai

jahāñ maiñ huuñ tum ho koī na ho mujhe is jahāñ kī talāsh hai

liye zauq-e-sajda meñ dar-ba-dar phirā maiñ ne paayā nahīñ magar

jahāñ apne aap jhuke jabīñ isī āstāñ kī talāsh hai

na hai vasl kī koī aarzū na to hijr kī koī guftugū

jo shikār ho ġham-e-ishq kā usī rāz-dāñ kī talāsh hai

use do ḳhabar ki vo āshiyāñ jo hai soz qalb se zau-fishāñ

ye sunā hai maiñ ne ki barq ko mire āshiyāñ kī talāsh hai

mire shauq-e-dīd kī aarzū nahīñ chand phūloñ kī justujū

mire rañg-o-bū ke mazāq ko kisī gulistāñ kī talāsh hai

mire dil meñ ġham kā jo ḳhaar hai mirā dil usī pe nisār hai

jise mere dard kā dard ho usī mehrbāñ kī talāsh hai

kisī dil meñ koī makīn hai kisī dar pe koī jabīn hai

jahāñ ho na koī mire sivā mujhe us makāñ kī talāsh hai

ye kis ne tum se ghalat kaha mujhe karwan ki talash hai

jahan main hun tum ho koi na ho mujhe is jahan ki talash hai

liye zauq-e-sajda mein dar-ba-dar phira main ne paya nahin magar

jahan apne aap jhuke jabin isi aastan ki talash hai

na hai wasl ki koi aarzu na to hijr ki koi guftugu

jo shikar ho gham-e-ishq ka usi raaz-dan ki talash hai

use do KHabar ki wo aashiyan jo hai soz qalb se zau-fishan

ye suna hai main ne ki barq ko mere aashiyan ki talash hai

mere shauq-e-did ki aarzu nahin chand phulon ki justuju

mere rang-o-bu ke mazaq ko kisi gulistan ki talash hai

mere dil mein gham ka jo KHar hai mera dil usi pe nisar hai

jise mere dard ka dard ho usi mehrban ki talash hai

kisi dil mein koi makin hai kisi dar pe koi jabin hai

jahan ho na koi mere siwa mujhe us makan ki talash hai