ye kya ki sab se bayan dil ki haalaten karni

ye kyā ki sab se bayāñ dil kī hālateñ karnī

'farāz' tujh ko na aa.iiñ mohabbateñ karnī

ye qurb kyā hai ki tū sāmne hai aur hameñ

shumār abhī se judā.ī kī sā.ateñ karnī

koī ḳhudā ho ki patthar jise bhī ham chāheñ

tamām umr usī kī ibādateñ karnī

sab apne apne qarīne se muntazir us ke

kisī ko shukr kisī ko shikāyateñ karnī

ham apne dil se hī majbūr aur logoñ ko

zarā sī baat pe barpā qayāmateñ karnī

mileñ jab un se to mub.ham sī guftugū karnā

phir apne aap se sau sau vazāhateñ karnī

ye log kaise magar dushmanī nibāhte haiñ

hameñ to raas na aa.iiñ mohabbateñ karnī

kabhī 'farāz' na.e mausamoñ meñ ro denā

kabhī talāsh purānī rifāqateñ karnī

ye kya ki sab se bayan dil ki haalaten karni

'faraaz' tujh ko na aain mohabbaten karni

ye qurb kya hai ki tu samne hai aur hamein

shumar abhi se judai ki saaten karni

koi KHuda ho ki patthar jise bhi hum chahen

tamam umr usi ki ibaadaten karni

sab apne apne qarine se muntazir us ke

kisi ko shukr kisi ko shikayaten karni

hum apne dil se hi majbur aur logon ko

zara si baat pe barpa qayamaten karni

milen jab un se to mubham si guftugu karna

phir apne aap se sau sau wazahaten karni

ye log kaise magar dushmani nibahte hain

hamein to ras na aain mohabbaten karni

kabhi 'faraaz' nae mausamon mein ro dena

kabhi talash purani rifaqaten karni