ye kya maqam hai wo nazare kahan gae

ye kyā maqām hai vo nazāre kahāñ ga.e

vo phuul kyā hue vo sitāre kahāñ ga.e

yārān-e-bazm jur.at-e-rindāna kyā huī

un mast añkhḌiyoñ ke ishāre kahāñ ga.e

ek aur daur kā vo taqāzā kidhar gayā

umDe hue vo hosh ke dhāre kahāñ ga.e

uftād kyuuñ hai laġhzish-e-mastāna kyuuñ nahīñ

vo uzr-e-mai-kashī ke sahāre kahāñ ga.e

daurān-e-zalzala jo panāh-e-nigāh the

leTe hue the paañv pasāre kahāñ ga.e

bāñdhā thā kyā havā pe vo ummīd kā tilism

rañgīni-e-nazar ke ġhubāre kahāñ ga.e

uTh uTh ke baiTh baiTh chukī gard raah kī

yaaro vo qāfile thake haare kahāñ ga.e

har mīr-e-kārvāñ se mujhe pūchhnā paḌā

sāthī tire kidhar ko sidhāre kahāñ ga.e

farmā ga.e the raah meñ baiTh intizār kar

aa.e nahīñ palaT ke vo pyāre kahāñ ga.e

tum se bhī jin kā ahd-e-vafā ustuvār thā

ai dushmanoñ vo dost hamāre kahāñ ga.e

kashtī na.ī banī ki uThā le gayā koī

taḳhte jo lag ga.e the kināre kahāñ ga.e

ab Dūbtoñ se pūchhtā phirtā hai nāḳhudā

jin ko lagā chukā huuñ kināre kahāñ ga.e

betāb tere dard se the chārāgar 'hafīz'

kyā jāniye vo dard ke maare kahāñ ga.e

ye kya maqam hai wo nazare kahan gae

wo phul kya hue wo sitare kahan gae

yaran-e-bazm jurat-e-rindana kya hui

un mast ankhDiyon ke ishaare kahan gae

ek aur daur ka wo taqaza kidhar gaya

umDe hue wo hosh ke dhaare kahan gae

uftad kyun hai laghzish-e-mastana kyun nahin

wo uzr-e-mai-kashi ke sahaare kahan gae

dauran-e-zalzala jo panah-e-nigah the

leTe hue the panw pasare kahan gae

bandha tha kya hawa pe wo ummid ka tilism

rangini-e-nazar ke ghubare kahan gae

uTh uTh ke baiTh baiTh chuki gard rah ki

yaro wo qafile thake haare kahan gae

har mir-e-karwan se mujhe puchhna paDa

sathi tere kidhar ko sidhaare kahan gae

farma gae the rah mein baiTh intizar kar

aae nahin palaT ke wo pyare kahan gae

tum se bhi jin ka ahd-e-wafa ustuwar tha

ai dushmanon wo dost hamare kahan gae

kashti nai bani ki uTha le gaya koi

taKHte jo lag gae the kinare kahan gae

ab Dubton se puchhta phirta hai naKHuda

jin ko laga chuka hun kinare kahan gae

betab tere dard se the chaaragar 'hafiz'

kya jaaniye wo dard ke mare kahan gae