ye kya sitam-zarifi-e-fitrat hai aaj-kal

ye kyā sitam-zarīfī-e-fitrat hai āj-kal

begāngī sharīk-e-mohabbat hai āj-kal

ġham hai ki ek talḳh haqīqat hai āj-kal

dil hai ki sogvār-e-mohabbat hai āj-kal

tanhā.ī-e-firāq se ghabrā rahā huuñ maiñ

mere liye sukūñ bhī qayāmat hai āj-kal

har saañs tarjumān-e-ġham-e-dil hai in dinoñ

har aah parda-dār-e-hikāyat hai āj-kal

merī vafā hī mere liye qahr ban ga.ī

apnī vafā pe un ko nadāmat hai āj-kal

phir chāhtā huuñ ik alam tāza-tar 'shakīl'

phir dil ko justajū-e-masarrat hai āj-kal

ye kya sitam-zarifi-e-fitrat hai aaj-kal

begangi sharik-e-mohabbat hai aaj-kal

gham hai ki ek talKH haqiqat hai aaj-kal

dil hai ki sogwar-e-mohabbat hai aaj-kal

tanhai-e-firaq se ghabra raha hun main

mere liye sukun bhi qayamat hai aaj-kal

har sans tarjuman-e-gham-e-dil hai in dinon

har aah parda-dar-e-hikayat hai aaj-kal

meri wafa hi mere liye qahr ban gai

apni wafa pe un ko nadamat hai aaj-kal

phir chahta hun ek alam taza-tar 'shakil'

phir dil ko justaju-e-masarrat hai aaj-kal