ye man lo ki gham hai zaruri KHushi ke baad

ye maan lo ki ġham hai zarūrī ḳhushī ke baad

ik tīrgī kā daur hai is raushnī ke baad

ai dil ye iztirāb tire kaam aa.egā

mil jā.egā sukūn tujhe bekalī ke baad

jab tabsira kareñ vo mire vāqi.āt par

dīvāngī kī baat chhiḌe āgahī ke baad

duniyā sañvārnī hai to uqbā kī fikr kar

ik aur zindagī bhī hai is zindagī ke baad

ābād ho sakegā na saaqī kisī tarah

mai-ḳhāna-e-hayāt mirī mai-kashī ke baad

hosh-o-ḳhirad ke saath na dīvāngī chalī

paiġhām be-ḳhudī kā milā hai ḳhudī ke baad

dair-o-haram ke raaz se vāqif na thā bashar

irfān bandagī kā huā bandagī ke baad

dil zindagī ke naam se bezār ho gayā

ai jān-e-kā.enāt tirī be-ruḳhī ke baad

ye bazm-e-rang-o-bū hai jo ham se sajī huī

luT jā.egī ye bazm ghaḌī do ghaḌī ke baad

tum markaz-e-ḳhayāl ho tum markaz-e-nigāh

koī galī nahīñ hai tumhārī galī ke baad

tark-e-ta.alluqāt se zāhir huā 'nigār'

bantī hai dushmanī kī fazā dostī ke baad

ye man lo ki gham hai zaruri KHushi ke baad

ek tirgi ka daur hai is raushni ke baad

ai dil ye iztirab tere kaam aaega

mil jaega sukun tujhe bekali ke baad

jab tabsira karen wo mere waqiat par

diwangi ki baat chhiDe aagahi ke baad

duniya sanwarni hai to uqba ki fikr kar

ek aur zindagi bhi hai is zindagi ke baad

aabaad ho sakega na saqi kisi tarah

mai-KHana-e-hayat meri mai-kashi ke baad

hosh-o-KHirad ke sath na diwangi chali

paigham be-KHudi ka mila hai KHudi ke baad

dair-o-haram ke raaz se waqif na tha bashar

irfan bandagi ka hua bandagi ke baad

dil zindagi ke nam se bezar ho gaya

ai jaan-e-kaenat teri be-ruKHi ke baad

ye bazm-e-rang-o-bu hai jo hum se saji hui

luT jaegi ye bazm ghaDi do ghaDi ke baad

tum markaz-e-KHayal ho tum markaz-e-nigah

koi gali nahin hai tumhaari gali ke baad

tark-e-talluqat se zahir hua 'nigar'

banti hai dushmani ki faza dosti ke baad