ye mat bhula ki yahan jis qadar ujale hain

ye mat bhulā ki yahāñ jis qadar ujāle haiñ

ye aadmī ne añdheroñ se hī nikāle haiñ

na pūchh kyuuñ hai ye rañg-e-ġhazal meñ tabdīlī

ye dekh sīna-e-shā.ir meñ kitne chhāle haiñ

libās-e-sabr-o-tahammul jo ham haiñ pahne hue

ab is ke lagtā hai baḳhiye udhaḌne vaale haiñ

tavaqquāt vahī aaj bhī haiñ yāroñ se

ki ab bhī yaar sabhī āstīn vaale haiñ

ḳhamosh kāñpte mohre laraz rahā hai bisāt

na jaane kaun sī vo chaal chalne vaale haiñ

ye kyā sitam hai ki un ko bhī maiñ baḌā likkhūñ

jo log aaj baḌe kārobār vaale haiñ

ḳhudā kare ki 'sa.ādat' tumheñ sujhā.ī deñ

jo mere sheroñ meñ mafhūm ke ujāle haiñ

ye mat bhula ki yahan jis qadar ujale hain

ye aadmi ne andheron se hi nikale hain

na puchh kyun hai ye rang-e-ghazal mein tabdili

ye dekh sina-e-shair mein kitne chhaale hain

libas-e-sabr-o-tahammul jo hum hain pahne hue

ab is ke lagta hai baKHiye udhaDne wale hain

tawaqquat wahi aaj bhi hain yaron se

ki ab bhi yar sabhi aastin wale hain

KHamosh kanpte mohre laraz raha hai bisat

na jaane kaun si wo chaal chalne wale hain

ye kya sitam hai ki un ko bhi main baDa likkhun

jo log aaj baDe karobar wale hain

KHuda kare ki 'saadat' tumhein sujhai den

jo mere sheron mein mafhum ke ujale hain