ye mat samajhna faqir hun main

ye mat samajhnā faqīr huuñ maiñ

anā ke haq meñ kasīr huuñ maiñ

mujhe sitāra samajhne vāloñ

falak pe badr-e-munīr huuñ maiñ

hai munsifī mere dam se qaa.em

adālatoñ kī mushīr huuñ maiñ

hai mujh meñ zanjīr chāhatoñ kī

mohabbatoñ kī asiir huuñ maiñ

haqīqateñ mujh meñ ḳhema-zan haiñ

sadāqatoñ kī safīr huuñ maiñ

kahāñ ga.ī ishq kī vo shiddat

na tū vo rāñjhā na hiir huuñ maiñ

kahāñ rahā tīrgī kā aalam

azal se raushan-zamīr huuñ maiñ

sajā hai sheroñ meñ dard 'mīnā'

ġhazal ke lahje kī 'mīr' huuñ maiñ

ye mat samajhna faqir hun main

ana ke haq mein kasir hun main

mujhe sitara samajhne walon

falak pe badr-e-munir hun main

hai munsifi mere dam se qaem

adalaton ki mushir hun main

hai mujh mein zanjir chahaton ki

mohabbaton ki asir hun main

haqiqaten mujh mein KHema-zan hain

sadaqaton ki safir hun main

kahan gai ishq ki wo shiddat

na tu wo ranjha na hir hun main

kahan raha tirgi ka aalam

azal se raushan-zamir hun main

saja hai sheron mein dard 'mina'

ghazal ke lahje ki 'mir' hun main