ye mir-e-sitam-kushta kisu waqt jawan tha

ye 'mīr'-e-sitam-kushta kisū vaqt javāñ thā

andāz-e-suḳhan kā sabab shor o fuġhāñ thā

jaadū kī puḌī parcha-e-abyāt thā us kā

muñh takiye ġhazal paḌhte ajab sehr-bayāñ thā

jis raah se vo dil-zada dillī meñ nikaltā

saath us ke qayāmat kā sā hañgāma ravāñ thā

afsurda na thā aisā ki juuñ āb-zada ḳhaak

āñdhī thī balā thā koī āshob-e-jahāñ thā

kis martaba thī hasrat-e-dīdār mire saath

jo phuul mirī ḳhaak se niklā nigrāñ thā

majnūñ ko abas dāva-e-vahsaht hai mujhī se

jis din ki junūñ mujh ko huā thā vo kahāñ thā

ġhāfil the ham ahvāl-e-dil-e-ḳhasta se apne

vo ganj usī kunj-e-ḳharābī meñ nihāñ thā

kis zor se farhād ne ḳhārā-shikanī kī

har-chand ki vo bekas o be-tāb-o-tavāñ thā

go 'mīr' jahāñ meñ kinhoñ ne tujh ko na jaanā

maujūd na thā tū to kahāñ nām-o-nishāñ thā

ye 'mir'-e-sitam-kushta kisu waqt jawan tha

andaz-e-suKHan ka sabab shor o fughan tha

jadu ki puDi parcha-e-abyat tha us ka

munh takiye ghazal paDhte ajab sehr-bayan tha

jis rah se wo dil-zada dilli mein nikalta

sath us ke qayamat ka sa hangama rawan tha

afsurda na tha aisa ki jun aab-zada KHak

aandhi thi bala tha koi aashob-e-jahan tha

kis martaba thi hasrat-e-didar mere sath

jo phul meri KHak se nikla nigran tha

majnun ko abas dawa-e-wahsaht hai mujhi se

jis din ki junun mujh ko hua tha wo kahan tha

ghafil the hum ahwal-e-dil-e-KHasta se apne

wo ganj usi kunj-e-KHarabi mein nihan tha

kis zor se farhad ne KHara-shikani ki

har-chand ki wo bekas o be-tab-o-tawan tha

go 'mir' jahan mein kinhon ne tujh ko na jaana

maujud na tha tu to kahan nam-o-nishan tha