ye meri ijad-e-izhaar-e-tamanna dekhiye

ye mirī ījād-e-iz.hār-e-tamanna dekhiye

shabnamī āñkhoñ kā dar-parda taqāzā dekhiye

sirf do āñkheñ milī haiñ in se kyā kyā dekhiye

har nafas har gaam par nairang-e-duniyā dekhiye

be-ḳhudī-e-shauq kā taaza karishma dekhiye

dekhiye mujh ko bharī mahfil meñ tanhā dekhiye

mehvar-e-husn-e-zamīñ kal tak mirā har sher thā

ab mire afkār ko aflāk-paimā dekhiye

nukta-chīnī ‘aib-jūī kā gila bekār hai

aap se kis ne kahā thā zehn-e-duniyā dekhiye

un laboñ par sirf tahrīk-e-tabassum ke liye

tāb-e-nazzāra ko rusvā aur rusvā dekhiye

jumbish-e-parda se haiñ ausān gum idrāk gum

aur is aalam meñ ye tākīd jalva dekhiye

aap kā naqd-e-tamāshā mo'tabar ho jā.egā

apnā chehra dekh kar auroñ kā chehra dekhiye

imtiyāz-e-ḳhās-o-ām is kī shu’ā’oñ par harām

ġhair-jānib-dār sūraj kā ujālā dekhiye

merā saaya bhī añdhere meñ nahīñ hai ham-qadam

sochnā paḌtā hai ab kis kā sahārā dekhiye

fitrat-e-tasvīr bhī un kī tarah mohtāt hai

aap is se ḳhvāh bāteñ kījiye yā dekhiye

tishnagī teġhoñ ke saa.e dhuup ġhurbat ai 'urūj'

aap ne sajda kahāñ dekhā hai sajda dekhiye

ye meri ijad-e-izhaar-e-tamanna dekhiye

shabnami aankhon ka dar-parda taqaza dekhiye

sirf do aankhen mili hain in se kya kya dekhiye

har nafas har gam par nairang-e-duniya dekhiye

be-KHudi-e-shauq ka taza karishma dekhiye

dekhiye mujh ko bhari mahfil mein tanha dekhiye

mehwar-e-husn-e-zamin kal tak mera har sher tha

ab mere afkar ko aflak-paima dekhiye

nukta-chini ‘aib-jui ka gila bekar hai

aap se kis ne kaha tha zehn-e-duniya dekhiye

un labon par sirf tahrik-e-tabassum ke liye

tab-e-nazzara ko ruswa aur ruswa dekhiye

jumbish-e-parda se hain ausan gum idrak gum

aur is aalam mein ye takid jalwa dekhiye

aap ka naqd-e-tamasha mo'tabar ho jaega

apna chehra dekh kar auron ka chehra dekhiye

imtiyaz-e-KHas-o-am is ki shu’a’on par haram

ghair-jaanib-dar suraj ka ujala dekhiye

mera saya bhi andhere mein nahin hai ham-qadam

sochna paDta hai ab kis ka sahaara dekhiye

fitrat-e-taswir bhi un ki tarah mohtat hai

aap is se KHwah baaten kijiye ya dekhiye

tishnagi teghon ke sae dhup ghurbat ai 'uruj'

aap ne sajda kahan dekha hai sajda dekhiye