ye na samjho ghubar hain hum log

ye na samjho ġhubār haiñ ham log

ḳhushbuoñ kī qatār haiñ ham log

log ham ko ḳhizāñ samajhte haiñ

jab ki taaza bahār haiñ ham log

ye sharāfat nahīñ to phir kyā hai

dushmanoñ par nisār haiñ ham log

vo bhī kāñToñ se kam nahīñ haiñ kuchh

jin kī nazroñ meñ ḳhaar haiñ ham log

thoḌā ham se bhī pyaar kar liije

qābil-e-e'tibār haiñ ham log

apnī hālat sañvar nahīñ saktī

buzdilī kā shikār haiñ ham log

aaj momin haiñ mā.il-e-pastī

is ke ḳhud zimmedār haiñ ham log

the kabhī tājdār ab 'ḳhurshīd'

dāman-e-tār-tār haiñ ham log

ye na samjho ghubar hain hum log

KHushbuon ki qatar hain hum log

log hum ko KHizan samajhte hain

jab ki taza bahaar hain hum log

ye sharafat nahin to phir kya hai

dushmanon par nisar hain hum log

wo bhi kanTon se kam nahin hain kuchh

jin ki nazron mein KHar hain hum log

thoDa hum se bhi pyar kar lije

qabil-e-e'tibar hain hum log

apni haalat sanwar nahin sakti

buzdili ka shikar hain hum log

aaj momin hain mail-e-pasti

is ke KHud zimmedar hain hum log

the kabhi tajdar ab 'KHurshid'

daman-e-tar-tar hain hum log