ye nahin hai ki tujhe maine pukara kam hai

ye nahīñ hai ki tujhe maiñ ne pukārā kam hai

mere nāloñ ko havāoñ kā sahārā kam hai

is qadar hijr meñ kī najm-shumārī ham ne

jaan lete haiñ kahāñ koī sitārā kam hai

dostī meñ to koī shak nahīñ us kī par vo

dost dushman kā ziyāda hai hamārā kam hai

saaf iz.hār ho aur vo bhī kam-az-kam do baar

ham vo aaqil haiñ jinheñ ek ishārā kam hai

ek ruḳhsār pe dekhā hai vo til ham ne bhī

ho samarqand muqābil ki buḳhārā kam hai

itnī jaldī na banā raa.e mire baare meñ

ham ne hamrāh abhī vaqt guzārā kam hai

baaġh ik ham ko milā thā magar us ko afsos

ham ne jī bhar ke bigāḌā hai sañvārā kam hai

aaj tak apnī samajh meñ nahīñ aayā 'bāsir'

kaun sā kaam hai vo jis meñ ḳhasārā kam hai

ye nahin hai ki tujhe main ne pukara kam hai

mere nalon ko hawaon ka sahaara kam hai

is qadar hijr mein ki najm-shumari hum ne

jaan lete hain kahan koi sitara kam hai

dosti mein to koi shak nahin us ki par wo

dost dushman ka ziyaada hai hamara kam hai

saf izhaar ho aur wo bhi kam-az-kam do bar

hum wo aaqil hain jinhen ek ishaara kam hai

ek ruKHsar pe dekha hai wo til hum ne bhi

ho samarqand muqabil ki buKHara kam hai

itni jaldi na bana rae mere bare mein

hum ne hamrah abhi waqt guzara kam hai

bagh ek hum ko mila tha magar us ko afsos

hum ne ji bhar ke bigaDa hai sanwara kam hai

aaj tak apni samajh mein nahin aaya 'basir'

kaun sa kaam hai wo jis mein KHasara kam hai