ye nahin hum ko shikayat aap kyon aate nahin

ye nahīñ ham ko shikāyat aap kyoñ aate nahīñ

aap aate haiñ magar ham aap ko paate nahīñ

kuchh samajh kar hī ham un kī bazm meñ jaate nahīñ

dostī kā paas hai dushman se ghabrāte nahīñ

shukr hai itnā to hai āshiq-navāzī kā ḳhayāl

paas se jaate haiñ lekin dil se vo jaate nahīñ

muñh se kah sakte nahīñ bas dekhte haiñ har taraf

vo uThe pahlū se ham pahlū meñ dil paate nahīñ

aap aate haiñ to fauran khol dete haiñ ham aañkh

aap jaate haiñ to pahroñ hosh meñ aate nahīñ

dar-haqīqat vasl hai 'beḳhud' hamārī be-ḳhudī

un ko paate haiñ to apne aap ko paate nahīñ

ye nahin hum ko shikayat aap kyon aate nahin

aap aate hain magar hum aap ko pate nahin

kuchh samajh kar hi hum un ki bazm mein jate nahin

dosti ka pas hai dushman se ghabraate nahin

shukr hai itna to hai aashiq-nawazi ka KHayal

pas se jate hain lekin dil se wo jate nahin

munh se kah sakte nahin bas dekhte hain har taraf

wo uThe pahlu se hum pahlu mein dil pate nahin

aap aate hain to fauran khol dete hain hum aankh

aap jate hain to pahron hosh mein aate nahin

dar-haqiqat wasl hai 'beKHud' hamari be-KHudi

un ko pate hain to apne aap ko pate nahin