ye nahin kahta tujhe pyar na hone pae

ye nahīñ kahtā tujhe pyaar na hone paa.e

haañ magar kū-ba-kū aḳhbār na hone paa.e

naaz se ham ne sajāyā hai gharauñdā dil kā

terī Thokar se ye mismār na hone paa.e

baa'd muddat ke mire dil ne shifā paa.ī hai

ab kahīñ phir se ye bīmār na hone paa.e

daar pe sar ko jo rakkhā to yahī sochā thā

baa'd mere koī sardār na hone paa.e

manzil-e-ishq ko jaate to ho mahbūb mire

par anā raah meñ dīvār na hone paa.e

apnī tanhā.ī ke sho.aloñ meñ jale ham tanhā

dost hamdard the ġham-ḳhvār na hone paa.e

un kī āñkhoñ se ayaañ hotī hai ulfat merī

phir bhī ye zid hai ki iqrār na hone paa.e

mere ghar aane kā va.ada to kiyā hai tum ne

aate aate kahīñ inkār na hone paa.e

dost sab pūchhte rahte haiñ sabab ġhazloñ kā

itnā mohtāt huuñ iz.hār na hone paa.e

ye nahin kahta tujhe pyar na hone pae

han magar ku-ba-ku aKHbar na hone pae

naz se hum ne sajaya hai gharaunda dil ka

teri Thokar se ye mismar na hone pae

ba'd muddat ke mere dil ne shifa pai hai

ab kahin phir se ye bimar na hone pae

dar pe sar ko jo rakkha to yahi socha tha

ba'd mere koi sardar na hone pae

manzil-e-ishq ko jate to ho mahbub mere

par ana rah mein diwar na hone pae

apni tanhai ke shoalon mein jale hum tanha

dost hamdard the gham-KHwar na hone pae

un ki aankhon se ayan hoti hai ulfat meri

phir bhi ye zid hai ki iqrar na hone pae

mere ghar aane ka wada to kiya hai tum ne

aate aate kahin inkar na hone pae

dost sab puchhte rahte hain sabab ghazlon ka

itna mohtat hun izhaar na hone pae