ye namaz aaKHiri hai ye salam aaKHiri hai

ye namāz āḳhirī hai ye salām āḳhirī hai

mujhe bāryāb kar tū mirā kaam āḳhirī hai

ye kamāl hai junūñ kā tirī justujū meñ nikle

kise aur ham pukāreñ tirā naam āḳhirī hai

sabhī toḌ kar qafas ko haiñ khulī fazā meñ raqsāñ

abhī kashmakash kā maarā ye ġhulām āḳhirī hai

vo jo aanā chāhte haiñ to kaho ki jald aa.eñ

mirā dard lā-davā hai mirī shaam āḳhirī hai

ka.ī baar maiñ ne tauba yahī kah ke toḌ Daalī

mujhe ek jaam saaqī yahī jaam āḳhirī hai

ye jo khā rahā huuñ kam-kam ye jo pī rahā huuñ be-had

ye halāl āḳhirī hai ye harām āḳhirī hai''

sar-e-shām jal uThā hai tirā zaḳhm-e-ārzū bhī

mirī zindagī kī shāyad yahī shaam āḳhirī hai

mirā dam nikal rahā hai mirī aañkh bujh rahī hai

ye salām merā le le ye salām āḳhirī hai

tū jahāñ hai aaj 'ahsan' vahāñ koī ab nahīñ hai

tirī shohratoñ kā shāyad yahī baam āḳhirī hai

ye namaz aaKHiri hai ye salam aaKHiri hai

mujhe baryab kar tu mera kaam aaKHiri hai

ye kamal hai junun ka teri justuju mein nikle

kise aur hum pukaren tera nam aaKHiri hai

sabhi toD kar qafas ko hain khuli faza mein raqsan

abhi kashmakash ka mara ye ghulam aaKHiri hai

wo jo aana chahte hain to kaho ki jald aaen

mera dard la-dawa hai meri sham aaKHiri hai

kai bar main ne tauba yahi kah ke toD Dali

mujhe ek jam saqi yahi jam aaKHiri hai

ye jo kha raha hun kam-kam ye jo pi raha hun be-had

ye halal aaKHiri hai ye haram aaKHiri hai

sar-e-sham jal uTha hai tera zaKHm-e-arzu bhi

meri zindagi ki shayad yahi sham aaKHiri hai

mera dam nikal raha hai meri aankh bujh rahi hai

ye salam mera le le ye salam aaKHiri hai

tu jahan hai aaj 'ahsan' wahan koi ab nahin hai

teri shohraton ka shayad yahi baam aaKHiri hai