ye nashist-e-gham hai isko koi rit to nibhao

ye nashist-e-ġham hai is kī koī riit to nibhāo

maiñ ġhazal sunā rahā huuñ mujhe chhoḌ kar na jaao

shab-e-tār kā fasāna kabhī muḳhtasar bhī hogā

koī sham.a to jalāo koī jaam to uThāo

ye ġhurūr-e-teġh-e-qātil kabhī sar-nigūñ bhī hogā

sar-e-bazm choT khā kar sar-e-rāh muskurāo

tumheñ sar-buland pā kar chalī jaa.e sar jhukā kar

kabhī marg-e-nā-gahāñ se zarā yuuñ bhī pesh aao

zarā dekho gardanoñ par sar-e-shām jhuk chale haiñ

ye kañval haiñ kitne pyāre inheñ daar par sajāo

use khīñch lo palañg se vo jo so ke thak gayā hai

ye jo thak ke so gayā hai use pyaar se jagāo

rahā sar hamesha taane sahe hañs ke tāziyāne

vo gurez-pā huā kyuuñ koī 'soz' ko manāo

ye nashist-e-gham hai is ki koi rit to nibhao

main ghazal suna raha hun mujhe chhoD kar na jao

shab-e-tar ka fasana kabhi muKHtasar bhi hoga

koi shama to jalao koi jam to uThao

ye ghurur-e-tegh-e-qatil kabhi sar-nigun bhi hoga

sar-e-bazm choT kha kar sar-e-rah muskurao

tumhein sar-buland pa kar chali jae sar jhuka kar

kabhi marg-e-na-gahan se zara yun bhi pesh aao

zara dekho gardanon par sar-e-sham jhuk chale hain

ye kanwal hain kitne pyare inhen dar par sajao

use khinch lo palang se wo jo so ke thak gaya hai

ye jo thak ke so gaya hai use pyar se jagao

raha sar hamesha tane sahe hans ke taziyane

wo gurez-pa hua kyun koi 'soz' ko manao