ye nazzara na dekha tha faraaz-e-baam se pahle

ye nazzāra na dekhā thā farāz-e-bām se pahle

nikaltā hai koī sūraj ġhurūb-e-shām se pahle

usī ke naam kar Daale haiñ maiñ ne ratjage apne

kisī kā naam letā hai jo mere naam se pahle

tumhāre ātishīñ lahje se ham ḳhā.if nahīñ lekin

hamārī baat to sun lo zarā ārām se pahle

sukūt-e-shahr-e-ḳhāmoshāñ bhī jis par rashk farmā.e

kuchh aisī kaifiyat hotī hai har kohrām se pahle

rahīn-e-āb-o-dāna hī sahī āvārgī apnī

gharoñ ko lauT aate haiñ parinde shaam se pahle

ba-har-sūrat unheñ ranj-e-asīrī to uThānā hai

nazar daane pe hai parvāz jin kī daam se pahle

ye nazzara na dekha tha faraaz-e-baam se pahle

nikalta hai koi suraj ghurub-e-sham se pahle

usi ke nam kar Dale hain main ne ratjage apne

kisi ka nam leta hai jo mere nam se pahle

tumhaare aatishin lahje se hum KHaif nahin lekin

hamari baat to sun lo zara aaram se pahle

sukut-e-shahr-e-KHamoshan bhi jis par rashk farmae

kuchh aisi kaifiyat hoti hai har kohram se pahle

rahin-e-ab-o-dana hi sahi aawargi apni

gharon ko lauT aate hain parinde sham se pahle

ba-har-surat unhen ranj-e-asiri to uThana hai

nazar dane pe hai parwaz jin ki dam se pahle