ye qisson mein jo dukh uThane bandhe hain

ye qissoñ meñ jo dukh uThāne bañdhe haiñ

so ulfat hī ke sab fasāne bañdhe haiñ

qafas meñ suno lo asīrān-e-kohna

ba-har-shāḳh-e-nau āshiyāne bañdhe haiñ

ḳhudā jaane is ghar meñ kyā hai ki jis ke

ka.ī dar ke aage divāne bañdhe haiñ

vo aañsū haiñ apne ki sab kī girah meñ

ka.ī motiyoñ ke ḳhazāne bañdhe haiñ

havā ye dayār-e-mohabbat kī bigḌī

ki sab rahne vāloñ ke shāne bañdhe haiñ

mulāqāt kyā ho rahe Thaur bas ham

ki jaane ke vaañ to Thikāne bañdhe haiñ

lageñ kyuuñ na tīr-e-nigah dil jigar par

ki us chashm ke ye nishāne bañdhe haiñ

falak tere hāthoñ baḌe the jo daanā

so ab un ke palloñ meñ daane bañdhe haiñ

ġhazab sāda-rūoñ kī hai sādgī bhī

ki pheñTe ajab sūfiyāne bañdhe haiñ

huī ghar meñ shādī tumhāre to aisī

ki jis ke jahāñ meñ fasāne bañdhe haiñ

na bulvāne kā ham ko shikva hai dekho

bañdhan-vār ab tak purāne bañdhe haiñ

baḳhīl ab ye mun.im nahīñ kyūñki 'jur.at'

kase jin ke ḳhvānoñ meñ khāne bañdhe haiñ

ye qisson mein jo dukh uThane bandhe hain

so ulfat hi ke sab fasane bandhe hain

qafas mein suno lo asiran-e-kohna

ba-har-shaKH-e-nau aashiyane bandhe hain

KHuda jaane is ghar mein kya hai ki jis ke

kai dar ke aage diwane bandhe hain

wo aansu hain apne ki sab ki girah mein

kai motiyon ke KHazane bandhe hain

hawa ye dayar-e-mohabbat ki bigDi

ki sab rahne walon ke shane bandhe hain

mulaqat kya ho rahe Thaur bas hum

ki jaane ke wan to Thikane bandhe hain

lagen kyun na tir-e-nigah dil jigar par

ki us chashm ke ye nishane bandhe hain

falak tere hathon baDe the jo dana

so ab un ke pallon mein dane bandhe hain

ghazab sada-ruon ki hai sadgi bhi

ki phenTe ajab sufiyane bandhe hain

hui ghar mein shadi tumhaare to aisi

ki jis ke jahan mein fasane bandhe hain

na bulwane ka hum ko shikwa hai dekho

bandhan-war ab tak purane bandhe hain

baKHil ab ye munim nahin kyunki 'jurat'

kase jin ke KHwanon mein khane bandhe hain