ye raat din ka badalna nazar mein rahta hai

ye raat din kā badalnā nazar meñ rahtā hai

hamārā zehn musalsal safar meñ rahtā hai

nazar meñ us kī to vus.at hai āsmānoñ kī

go dekhne ko parinda shajar meñ rahtā hai

hamārā naam vo le le to log chauñk uTTheñ

ki fard fard hamāre asar meñ rahtā hai

shajar shajar jo samar hai to dekh ḳhud ko bhī

jahān-e-nau kā tasavvur samar meñ rahtā hai

har ek baat kā bilkul yaqīn aayā magar

hamārā ḳhauf tumhāre agar meñ rahtā hai

tujhe gumāñ hai ki manzil pe to pahuñch bhī gayā

har ek shaḳhs yahāñ rahguzar meñ rahtā hai

use sukūn hai is se ki ham ko chain nahīñ

bas ik junūn hamārī ḳhabar meñ rahtā hai

nahīñ hai kuchh bhī vo ai 'sād' bas ḳhayāl sā hai

magar ḳhayāl kā saudā to sar meñ rahtā hai

ye raat din ka badalna nazar mein rahta hai

hamara zehn musalsal safar mein rahta hai

nazar mein us ki to wusat hai aasmanon ki

go dekhne ko parinda shajar mein rahta hai

hamara nam wo le le to log chaunk uTThen

ki fard fard hamare asar mein rahta hai

shajar shajar jo samar hai to dekh KHud ko bhi

jahan-e-nau ka tasawwur samar mein rahta hai

har ek baat ka bilkul yaqin aaya magar

hamara KHauf tumhaare agar mein rahta hai

tujhe guman hai ki manzil pe to pahunch bhi gaya

har ek shaKHs yahan rahguzar mein rahta hai

use sukun hai is se ki hum ko chain nahin

bas ek junun hamari KHabar mein rahta hai

nahin hai kuchh bhi wo ai 'sad' bas KHayal sa hai

magar KHayal ka sauda to sar mein rahta hai