ye raat kitni bhayanak hai baam-o-dar ke liye

ye raat kitnī bhayānak hai bām-o-dar ke liye

kahāñ se lā.ūñ sirāj-e-munīr ghar ke liye

talab kī raah salāmat maqām-e-shauq bahut

takallufāt zarūrī nahīñ safar ke liye

jamāl-e-yār sazā-vār-e-jiht-e-ḳhās nahīñ

ajiib marhala dar-pesh hai nazar ke liye

ġharīb-e-shahr-e-tamannā asīr-e-dām-e-firāq

taḌap rahā hai sar-e-jāda ham-safar ke liye

basīrat-e-lab-o-lahja na zindagī kā shu.ūr

qarār bhī hai zarūrī dil o nazar ke liye

nashāt kā ruḳh-e-raushan dikhā ga.ī shab-e-ġham

duā ko haath uThāyā thā maiñ sahar ke liye

fuġhāñ ki jis ne zamāne ko raushnī baḳhshī

charāġh DhūñD rahā hai ḳhud apne ghar ke liye

hayāt daftar-e-taḳhlīq bhī hai ai 'shātir'

hayāt ek muamma bhī hai bashar ke liye

ye raat kitni bhayanak hai baam-o-dar ke liye

kahan se laun siraj-e-munir ghar ke liye

talab ki rah salamat maqam-e-shauq bahut

takallufat zaruri nahin safar ke liye

jamal-e-yar saza-war-e-jiht-e-KHas nahin

ajib marhala dar-pesh hai nazar ke liye

gharib-e-shahr-e-tamanna asir-e-dam-e-firaq

taDap raha hai sar-e-jada ham-safar ke liye

basirat-e-lab-o-lahja na zindagi ka shuur

qarar bhi hai zaruri dil o nazar ke liye

nashat ka ruKH-e-raushan dikha gai shab-e-gham

dua ko hath uThaya tha main sahar ke liye

fughan ki jis ne zamane ko raushni baKHshi

charagh DhunD raha hai KHud apne ghar ke liye

hayat daftar-e-taKHliq bhi hai ai 'shatir'

hayat ek muamma bhi hai bashar ke liye