ye reg-e-sahra pe jo kahani paDi hui hai

ye reg-e-sahrā pe jo kahānī paḌī huī hai

isī kahānī meñ zindagānī paḌī huī hai

koī bayābāñ se mujh ko āvāz de rahā hai

tumhāre hisse kī rā.egānī paḌī huī hai

kisī ke raste meñ manziloñ ke nishāñ paḌe haiñ

kisī ke raste meñ nā-gahānī paḌī huī hai

ye kaun palkoñ se ḳhāk-rūbī meñ munhamik hai

ye kis kī chaukhaT pe jāvedānī paḌī huī hai

tumhāre jaane ke baad bhī silvaToñ kī sūrat

udaas bistar pe ḳhush-gumānī paḌī huī hai

agarche ab us ke saare kirdār mar chuke haiñ

magar kitāboñ meñ vo kahānī paḌī huī hai

za.īfī hasrat bharī nigāhoñ se dekhtī hai

qazā ke ghere meñ naujavānī paḌī huī hai

kahāñ se lā.ūñ maiñ pyāse dariyā kī chārasāzī

kahāñ ye ajdād kī nishānī paḌī huī hai

ye reg-e-sahra pe jo kahani paDi hui hai

isi kahani mein zindagani paDi hui hai

koi bayaban se mujh ko aawaz de raha hai

tumhaare hisse ki raegani paDi hui hai

kisi ke raste mein manzilon ke nishan paDe hain

kisi ke raste mein na-gahani paDi hui hai

ye kaun palkon se KHak-rubi mein munhamik hai

ye kis ki chaukhaT pe jawedani paDi hui hai

tumhaare jaane ke baad bhi silwaTon ki surat

udas bistar pe KHush-gumani paDi hui hai

agarche ab us ke sare kirdar mar chuke hain

magar kitabon mein wo kahani paDi hui hai

zaifi hasrat bhari nigahon se dekhti hai

qaza ke ghere mein naujawani paDi hui hai

kahan se laun main pyase dariya ki chaarasazi

kahan ye ajdad ki nishani paDi hui hai