ye ret qais ke naqsh-e-qadam pe chalti rahi

ye ret qais ke naqsh-e-qadam pe chaltī rahī

samundaroñ ke ḳhad-o-ḳhāl ko badaltī rahī

kisī ke qadmoñ se raste lipaT ke royā kiye

kisī kī maut pe ḳhud maut haath maltī rahī

use kināre kā kankar samajh ke paañv na rakh

ye aarzū mere dil ke sadaf meñ paltī rahī

ġhurūr-e-tishna-dahānī tirī baqā kī qasam

nadī hamāre laboñ kī taraf uchhaltī rahī

jamī thī barf ravayyoñ kī surḳh āñkhoñ par

darūn-e-jism koī aag thī machaltī rahī

tamāsh-gāh-e-zamāna meñ zindagī apnī

sambhal ke girtī rahī gir ke phir sañbhaltī rahī

ye kaun ā.ina-paikar yahāñ se guzrā hai

ki jis kī gard-e-safar par nazar phisaltī rahī

ye ret qais ke naqsh-e-qadam pe chalti rahi

samundaron ke KHad-o-KHal ko badalti rahi

kisi ke qadmon se raste lipaT ke roya kiye

kisi ki maut pe KHud maut hath malti rahi

use kinare ka kankar samajh ke panw na rakh

ye aarzu mere dil ke sadaf mein palti rahi

ghurur-e-tishna-dahani teri baqa ki qasam

nadi hamare labon ki taraf uchhalti rahi

jami thi barf rawayyon ki surKH aankhon par

darun-e-jism koi aag thi machalti rahi

tamash-gah-e-zamana mein zindagi apni

sambhal ke girti rahi gir ke phir sanbhalti rahi

ye kaun aaina-paikar yahan se guzra hai

ki jis ki gard-e-safar par nazar phisalti rahi