ye roz roz ka milna milana mushkil hai

ye roz roz kā milnā milānā mushkil hai

vo kah rahā hai ki va.ada nibhānā mushkil hai

lagāv us se mire jism-o-jāñ ko aisā rahā

ki yaad rakhnā hai āsāñ bhulānā mushkil hai

bichhaḌte vaqt mire hoñT sī diye us ne

so āsmān ko sar pe uThānā mushkil hai

ab aa ga.e ho sitāre sajā ke palkoñ par

tumheñ batā to diyā thā zamāna mushkil hai

'salīm' 'fauz' nahīñ ishq ehtiyāt kā kaam

ye aag vo hai ki dāman bachānā mushkil hai

ye roz roz ka milna milana mushkil hai

wo kah raha hai ki wada nibhana mushkil hai

lagaw us se mere jism-o-jaan ko aisa raha

ki yaad rakhna hai aasan bhulana mushkil hai

bichhaDte waqt mere honT si diye us ne

so aasman ko sar pe uThana mushkil hai

ab aa gae ho sitare saja ke palkon par

tumhein bata to diya tha zamana mushkil hai

'salim' 'fauz' nahin ishq ehtiyat ka kaam

ye aag wo hai ki daman bachana mushkil hai